राष्ट्रिय सभा सदस्यमा गण्डकी प्रदेशबाट प्रा डा जगत तिमिल्सिना र सम्झना देवकोटा विजयी भएका छन्।
तिमिल्सिनाले ५ हजार ३३ मतभार पाएर विजयी भए भने देवकोटाले ५ हजार १४ मतभार पाइन्। तिमिल्सना नेपाली कांग्रेसका उम्मेदवार थिए भने देवकोटा एमालेकी उम्मेदवार थिइन्।
देशभर १९ जना राष्ट्रिय सभा सदस्य पद खाली हुन लागेपछि निर्वाचन आयोगले आइतबार निर्वाचन गरेको थियो। निर्वाचनमा कांग्रेस र एमालेले गठबन्धन गरेका थिए। गण्डकीबाट २०७६ सालमा भएको राष्ट्रिय सभा सदस्य निर्वाचनमा तत्कालीन माओवादीका नारायणकाजी श्रेष्ठ र एमालेकी भगवती न्यौपाने विजयी भएका थिए। उनीहरू दुबै जनाको कार्यकाल सकिएपछि भएको निर्वाचनमा तिमिल्सिना र देवकोटा विजयी भएका हुन्।
कांग्रेसबाट विजयी भएका तिमिल्सिना पार्टीको सुभेच्छुक संगठन प्राध्यापक संघका केन्द्रीय अध्यक्ष हुन्। गण्डकी प्रदेशबाट कांग्रेसले ५० जनाको नाम राष्ट्रिय सभा सदस्य उम्मेदवारका रूपमा प्रस्ताव गरे पनि पार्टी केन्द्रले तिमिल्सिनालाई उम्मेदवार बनाएको थियो। तिमिल्सिना प्रदेश र जिल्लाबाट सिफारिस भएका थिएनन्।
एमालेबाट विजयी भएकी सम्झना देवकोटाा पटक पटक निर्वाचनमा पराजित भएकी थिइन्।
२०८० सालमा राष्ट्रिय सभा सदस्यमै निर्वाचन लडेकी देवकोटा त्यतिबेला पराजित भएकी थिइन्। त्यतिबेला कांग्रेस र माओवादी केन्द्रको गठबन्धन बनेको थियो। २०७४ सालको स्थानीय निर्वाचनमा गोरखा नगरपालिकाको उपमेयरमा पराजित भएकी देवकोटा २०७९ को स्थानीय निर्वाचनमा मेयर लडेकी थिइन्। त्यतिबेला पनि उनी पराजित भएकी थिइन्।
गण्डकी प्रदेशमा आइतबार भएको निर्वाचनमा ५७ जना प्रदेश सांसद र स्थानीय तहका प्रमुख र उपप्रमुख गरी १६९ जनाले मतदान गरेका थिए।
गण्डकीमा ६० जना सांसद रहने व्यवस्था रहे पनि मनाङबाट निर्वाचित राजीव गुरूङ ‘दीपक मनाङे’ कारागार छन्। उनको सांसद पद अदालतको आदेशबाट खारेज भइसकेको छ। बाँकी ५९ प्रदेश सभा सदस्यले मतदान गर्न पाउने भए पनि राष्ट्रिय प्रजातन्त्र पार्टीबाट निर्वाचत २ जना सांसद पनि मतदानमा उपस्थित भएनन्।
गण्डकी प्रदेशमा ८५ वटा स्थानीय तहका प्रमुख र उपप्रमुख गरी १७० जनाले राष्ट्रिय सभा सदस्य निर्वाचनमा मतदान गर्न पाउँछन्। बागलुङको ढोरपाटन नगरपालिकाका प्रमुख देवकुमार नेपाली सहकारी ठगी अभियोगमा
अहिले बागलुङ कारागारमा रहेकाले उनको पद निलम्बित छ। सोही कारण मतदाता नामावलीमा उनको नाम हटाएर १६९ जना कायम गरेको थियो। नेपालीबाहेक अरू ३ जना पालिकाका प्रमुख र उपप्रमुख पनि मतदानमा सहभागी भएनन्।
स्याङ्जाको कालीगण्डकी गाउँपालिका अध्यक्ष खिमबहादुर थापालाई एमालेले फागुन २१ गते हुन गइरहेको प्रतिनिधि सभा सदस्यमा उम्मेदवार उठाएको छ। थापाले कालीगण्डकी गाउँपालिका प्रमुखबाट राजिनामा दिइसकेका छन्। सोही कारण उनी पनि मतदानमा सहभागी हुन पाएनन्।
यस्तै, स्याङ्जाकै वालिङ नगरपालिकाकी उपप्रमुख कविता गैह्रे पनि मतदानमा उपस्थित भइनन्।
नेपाली कांग्रेसबाट निर्वाचित उपप्रमुख गैह्रे हाल जर्मनीमा भएकाले मतदानमा उपस्थित हुन नसकेको वालिङ नगरपालिकाका प्रवक्ता पदमराज गुरुङले बताए। उनका अनुसार उपप्रमुख गैह्रे पारिवारिक कामको शिलशिलामा जर्मन गएकी हुन्। केही दिनमै उनी नेपाल फर्कने प्रवक्ता गुरुङलेले बताए।
यस्तै, मनाङको नार्पाभूमी गाउँपालिका अध्यक्ष कोन्जो तेन्जिङ लामा पनि मतदानमा उपस्थित भएनन्। उनी नेपाली कांग्रेसबाट गाउँपालिका अध्यक्ष निर्वाचित भएका थिए।
-1746009348.jpg)
