नेपाली कम्युनिस्ट पार्टीका संयोजक पुष्पकमल दाहाल 'प्रचण्ड'ले आफू खलनायक बनेर इतिहासको पनामा हराउन नचाहेको बताएका छन्।
आइतबार साँझ जेनजी र राष्ट्रका नाममा सम्बोधन गर्दै संयोजक प्रचण्डले आफू खलनायकको रूपमा इतिहासको पन्नामा हराउन नचाहेको र देशलाई सही दिशामा नपुर्याएसम्म विश्राम नलिने बताएका हुन्।
'यदि म धेरै अघि बिदा भएको भए, सायद देशले मलाई नायकको रूपमा मात्र सम्झिन्थ्यो होला। तर, म खलनायक बनेर इतिहासको पानामा हराउन चाहन्नँ। म यो देशलाई सही दिशामा नपुर्याएसम्म विश्राम लिने छैन,' उनले भनेका छन्, 'तपाईँहरूले मलाई आज कुन रूपमा देख्नुहुन्छ, त्यो तपाईँहरूको स्वतन्त्रता र अधिकार हो, तर मेरो अभावमा मेरो उपस्थितिको महसुस तब हुनेछ, जब तपाईँहरूले मैले कोरेका परिवर्तनहरूलाई भोग्नुहुनेछ। म हार मान्न तयार छैन, किनकि मेरो काम अझै सकिएको छैन।'
उनले आफू नयाँ विचारहरूका लागि सधैँ खुला रहेको तथा नयाँ पुस्तालाई स्वागत गर्न र नयाँपन आत्मसत गर्न तयार रहेको बताए।
तर हरेक हरेक चम्किलो चिज हिरा नहुनेमा पनि सजग हुन संयोजक प्रचण्डले बताएका छन्।
'आजको यो डिजिटल युगमा, सामाजिक सञ्जालका भ्रमहरूले तपाईंहरूलाई बहकाउन सक्छन्। कसैलाई तपाईंहरूलाई सानो महसुस गराउन नदिनुहोस्,' उनले भने।
उनले प्रश्न गर्न नछाड्न पनि नवपुस्ताहरूलाई आग्रह गरे। जबाफका लागि आफू हरदम तयार रहेको उनले बताएका छन्।
'प्रश्न सोध्न नछोड्नुहोस्, म त्यसको जवाफ दिन तयार छु। मलाई अझ बढी दबाब दिनुहोस्, म त्यसको सामना गर्न तयार छु। किनकि मलाई थाहा छ, मेरो शक्तिको स्रोत तपाईँहरू नै हो,' उनले भनेका छन्।
संयोजक प्रचण्डले अर्को २० वर्ष परीक्षण र त्रूटि गर्दै नयाँ नेताहरू जाँच्ने समय नभएको पनि बताएका छन्।
'आउनुहोस्, मिलेर एउटा यस्तो नेपाल बनाऔं, जहाँ कुनै पनि युवाले आफ्नो भविष्य खोज्न विदेशिनु नपरोस्,' उनले भनेका छन्।
-1746009348.jpg)
