इरानले अमेरिकाले आक्रमण गरे मध्यपूर्वमा क्षेत्रीय युद्ध सुरु हुने चेतावनी दिएको छ।
वाशिङ्टन र तेहरानबीच बढ्दै गएको तनावबीच आइतबार इरानका सर्वोच्च नेता आयातोल्लाह अली खामेनीले क्षेत्रीय युद्धको चेतावनी दिएका हुन्।
मध्यपूर्वका विभिन्न देशहरूमा अमेरिकी सेनाको अड्डाहरू छन्।
अघिल्लोपटक अमेरिकाले इरानमा हमला गरेपछि जबाफमा इरानले कतारमा रहेको अमेरिकी सैन्य अड्डामा हवाई हमला गरेको थियो।
इरानसँगको तनाव बढ्दै जाँदा अमेरिकाले बीचमा कतार लगायत मध्यपूर्वका केही देशका सैन्य हड्डाबाट कर्मचारीहरू फिर्ता बोलाएको थियो।
इरानले अमेरिकी हमला भए युरोपेली संघका सेनालाई पनि आतंकवादी समूहको सूचीमा राख्ने घोषणा गरेका छन्।
अमेरिकी राष्ट्रपति डोनाल्ड ट्रम्पले इरानमाथि दबाब बढाउँदै आणविक सम्झौतामा सहमत नभए हस्तक्षेप गर्ने चेतावनी दिँदै आएका छन्।
यही पृष्ठभूमिमा अमेरिकाले मध्यपूर्व क्षेत्रमा आफ्नो नौसैनिक उपस्थिति उल्लेखनीय रूपमा बढाएको छ।
हाल उक्त क्षेत्रमा अमेरिकी नौसेनाका ६ वटा युद्धपोत, एक विमानवाहक पोत र तीन ल्याटरल कम्ब्याट शिप तैनाथ रहेको भनेर अन्तर्राष्ट्रिय समाचार संस्था रोयटर्सले लेखेको छ।
इरानका सर्वोच्च नेता आयतुल्लाह अली खामेनेईले सरकारी सञ्चारमाध्यममार्फत प्रतिक्रिया दिँदै ट्रम्पका धम्कीले इरानी जनता नडराउने बताएका छन्।
'हामी कुनै देशमाथि आक्रमण सुरु गर्न चाहँदैनौं, तर कसैले आक्रमण वा उत्पीडन गरे इरानी राष्ट्रले कडा जवाफ दिनेछ,' खामेनीले भनेका छन्।
क्षेत्रीय युद्धबारे खामेनीको अभिव्यक्तिमा अमेरिकी राष्ट्रपति डोनाल्ड ट्रम्पले पनि जबाफ पनि दिएका छन्।
मार-ए-लागोमा पत्रकारहरूसँग कुराकानी गर्दै ट्रम्पले इरानी नेतृत्वले त्यसो भने पनि शक्तिशाली हतियार र लडाकू विमान अमेरिकासँग भएको बताए।
'उनीहरूले भन्ने त त्यही नै हो तर हतियार र शक्तिशाली विमानहरू त हामीसँग छ,' उनले भने।
ट्रम्पले वार्ताको हुने संकेत पनि गरेका छन्। अमेरिकाले इरान आणविक कार्यक्रम बन्द गरी वार्ताको टेबलमा नबसे सैन्य आक्रमण गर्ने धम्की दिएका थिए।
केही अघि ट्रम्पले अमेरिकी नौसेनाको एउटा ठूलो विमानबाहक युद्धपोत 'युएसएस अब्राहम लिंकन' इरानतर्फ पठाइसकेको भन्ने समाचारहरू सार्वजनिक भएका थिए।
यूएसएस अब्राहम लिंकन क्यारियर स्ट्राइक ग्रुप सोमबार हिन्द महासागरमा प्रवेश गरिसकेको र इरानको नजिक सरिरहेको भनेर अमेरिकी मिडियाहरूले समाचार लेखेका थिए।
-1746009348.jpg)
