निर्वाचन आयोगले सञ्चारमाध्यम टिकटकसँग समझदारी आदानप्रदान गरेको छ।
फागुन २१ गते हुने निर्वाचन लक्षित टिकटकका प्रतिनिधिसँग निर्वाचन आयोगले बुधबार छलफल गरी समझदारी गरेको हो।
निर्वाचनलाई असर पार्ने भ्रामक सूचना एवं हानिकारक सामग्री नियन्त्रण गर्न आयोगका सहसचिव नारायणप्रसाद भट्टराई र टिकटकका हेड अफ गभर्मेन्ट रेलेसन्स एन्ड पब्लिक पोलिसी फर्डउस अल मोट्टाकिनले समझदारीपत्रमा आदनप्रदान गरेको हो।
समझदारीपत्र आदान-प्रदान कार्यक्रममा निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारी, निर्वाचन आयुक्तद्वय डा. जानकीकुमारी तुलाधर र सगुन शम्शेर ज.ब.रा, आयोगका सचिव कृष्णबहादुर राउतलगायत आयोगका कर्मचारीहरूको समेत उपस्थिति थियो।
‘टिकटकले मुख्य तीनवटा निर्वाचन सदाचार लक्ष्यहरू संरक्षण, सशक्तिकरण र साझेदारी अन्तर्गत रहेर निर्वाचन आयोगलाई कुनै शुल्क नलिई सहयोग गर्ने जनाएको छ। यसले भ्रामक सूचना नियन्त्रण गर्न आधिकारिक सूचना तथा सन्देशहरू सम्प्रेषण तथा प्रचारप्रसार गर्ने र विश्वसनीय तथ्यहरू मात्र प्रयोगकर्तालाई उपलब्ध गराउने एवं सुरक्षित स्पेस निर्माणका लागि सहयोग पुर्याउने समेत अपेक्षा राखिएको छ,’ प्रवक्ता समेत रहेका भट्टराईले भने।
समझदारीपत्र अनुसार टिकटकले आसन्न प्रतिनिधि सभा सदस्य निर्वाचनको स्वच्छता प्रवर्द्धन तथा आयोगको क्षमता अभिवृद्धिको प्रयासमा सहयोग पुर्याउने समझदारी भएको छ।
‘साझेदारीले निर्वाचनसम्बन्धी भरपर्दो र विश्वसनीय सूचना सर्वसाधारणको पहुँचमा पुयाउन सहयोग पुग्ने विश्वास निर्वाचन आयोगले गरेको छ,’ भट्टराईले भने, ‘यो समझदारीपत्रले निर्वाचनको स्वच्छता प्रवर्द्धन गर्दै लोकतान्त्रिक प्रणालीको संस्थागत सवलीकरण गर्न महत्वपूर्ण सहयोग पुर्याउने र निर्वाचनलाई असर पार्न सक्ने भ्रामक सूचना तथा हानिकारक सामग्रीको नियन्त्रणका लागि आयोगबाट भइरहेको प्रयासमा योगदान पुऱ्याउने आयोगको विश्वास छ।’
-1746009348.jpg)
