पाकिस्तानका रक्षामन्त्री ख्वाजा आसिफले अमेरिकासँगको सम्बन्धबारे दिएको अभिव्यक्तिले राजनीतिक तथा कूटनीतिक वृत्तमा चर्चा चुलिएको छ।
गत सोमबार राष्ट्रियसभा बैठकमा अफगानिस्तानका युद्धहरूमा पाकिस्तानको भूमिकाबारे बोल्दै आसिफले अमेरिकाबारे टिप्पणी गरेका हुन्।
अन्तर्राष्ट्रिय समाचार संस्था 'बिबिसी' का अनुसार रक्षामन्त्री आसिफले आफ्ना रणनीतिक स्वार्थका लागि पाकिस्तानलाई 'ट्वाइलेट पेपरझैं प्रयोग गरेर फ्याँकिदिएको' आरोप लगाए।
उनले अफगानिस्तानमा लडिएका दुई युद्धमा पाकिस्तानले कुनै इस्लाम वा धार्मिक भावनाका कारण सहभागिता नजनाएको दाबी गरे।
'त्यो कुनै जिहाद थिएन, त्यो एक सुपर पावरको युद्ध थियो,' उनले भने।
आसिफले सन् १९७९ मा सुरू भएको सोभियत–अफगान युद्धको सन्दर्भ उठाउँदै सोभियत संघ अफगान सरकारको निम्तोमा काबुल पुगेको दाबी गरे।
उनका अनुसार उक्त युद्धलाई 'जिहाद' का रूपमा प्रस्तुत गरियो र त्यसका लागि पाकिस्तानले आफ्नो पाठ्यक्रमसमेत परिवर्तन गर्यो।
'हामीले ६० वा ७० को दशकमा पढेको पाठ्यक्रम फेरियो। हाम्रो राजनीतिक र धार्मिक मूल्यमा परिवर्तन गरियो, किनकि हामीले 'मेड इन अमेरिका जिहाद' लड्नुपर्थ्यो,' उनले भने।
आसिफले सेप्टेम्बर ११ पछि अमेरिकासँगको सहकार्य पाकिस्तानका लागि विनाशकारी बनेको बताए।
पाकिस्तानले अमेरिकाको नेतृत्वमा अफगानिस्तानमा सञ्चालन भएको अभियानमा साथ दिँदा तालिबानविरूद्ध उभिनुपरेको उल्लेख गर्दै आसिफले अमेरिका उक्त क्षेत्रबाट बाहिरिएपछि पाकिस्तान लामो समय हिंसा, अतिवाद र आर्थिक दबाबसँग जुधेको टिप्पणी गरे।
'आज पाकिस्तानमा बढेको आतंकवाद त्यही नीतिको 'ब्लोब्याक' हो,' उनले भने।
उनले सन् १९९९ को सैनिक कू र त्यसपछिको सरकार पनि अमेरिकासँग नजिकिन आतुर रहेको आरोप लगाए। अमेरिकाले २०–२५ वर्षमा करिब १० करोड मुसलमान मारेको दाबीसमेत उनले गरे।
आसिफको अभिव्यक्तिलाई पाकिस्तानी सञ्चारमाध्यमले व्यापक रूपमा नउठाए पनि केही सञ्चारमाध्यमले यसलाई विपक्षी नेता महमूद खानको टिप्पणीको जबाफका रूपमा प्रस्तुत गरेका छन्।
पाकिस्तानी सञ्चार माध्यम 'डन न्यूज' का अनुसार आसिफले दुई अफगान युद्धमा पाकिस्तानको भूमिका 'त्रुटिपूर्ण' भएको स्वीकार गरेका छन्।
अफगानिस्तानका लागि अमेरिकाका पूर्वराजदूत जाल्मी खलिलजादले आसिफको टिप्पणीमाथि प्रश्न उठाएका छन्। सामाजिक सञ्जाल 'एक्स' मा उनले पाकिस्तानले अमेरिकी सहयोग पाउँदै गर्दा अफगानिस्तानमा अमेरिकी सेनाविरूद्ध लड्ने समूहलाई समेत संरक्षण दिएको आरोप लगाएका छन्।
'के पाकिस्तानले दोहोरो खेल खेलेको हो?' उनले प्रश्न गरेका छन्।
पछिल्ला चार दशकमा अफगानिस्तानमाथि अमेरिकी हस्तक्षेप क्रममा पाकिस्तानले महत्त्वपूर्ण भूमिका खेलेको छ। सोभियतविरूद्धको संघर्षदेखि सेप्टेम्बर ११ पछिको 'आतंकवादविरूद्धको युद्ध' र सन् २०२१ मा अमेरिकी सेना फिर्तासम्म पाकिस्तान अमेरिकाको प्रमुख साझेदार रह्यो।
तर उनीहरूको सम्बन्ध सधैं सहज रहेन।
अल–कायदा प्रमुख ओसामा बिन लादेन पाकिस्तानको एबटाबादमा अमेरिकी कारबाहीमा मारिएपछि द्विपक्षीय सम्बन्धमा थप चिसोपन आयो। डोनाल्ड ट्रम्पले आफ्नो पहिलो कार्यकालमा पाकिस्तानलाई दिइँदै आएको सहायता रोकेका थिए।
इमरान खान प्रधानमन्त्री हुँदा अमेरिकाविरूद्ध खुला अभिव्यक्ति दिएका थिए। डोनाल्ड ट्रम्पको दोस्रो कार्यकालमा भने सम्बन्ध सुधारको संकेत देखिएको छ।
ट्रम्पले भारत–पाकिस्तान तनाव कम गर्न भूमिका खेलेको दाबी गरेका छन् भने पाकिस्तानले उनलाई नोबेल शान्ति पुरस्कारका लागि नामांकनसमेत गरेको छ।
-1746009348.jpg)
