बंगलादेशमा विद्यार्थी आन्दोलनबाट जन्मिएको पार्टी नेसनल सिटिजन्स पार्टी (एनसिपी) ले ६ सिट मात्रै जित्ने निश्चित भएको छ।
बंगलादेशको अनलाइन द डेली स्टारले मतगणना भइरहेको ६ सिटमा मात्रै एनसिपीले जित्ने निश्चित भएको जनाएको छ।
एनसिपी नेता नाहिद इस्लामले ढाका-११ मा अग्रता लिइरहेका छन्।
अरू स्थानमा केही नेताहरूको मात्रै जित पक्का भएको भनिएको छ।
एनसिपी नेता नाहिद इस्लामले मतदानअघि एनसिपीसहितको गठबन्धनले सरकार बनाउने दाबी गरेका थिए। यद्यपि परिणाम भने उल्टो आउने निश्चित भएको छ।
सन् २०२४ को जुलाइमा भएको विद्यार्थी आन्दोलनले तत्कालीन प्रधानमन्त्री शेख हसिनालाई देशै छाड्न बाध्य बनाएको थियो।
त्यतिबेला विद्यार्थीहरूको आन्दोलनमा सरकारले दमन गर्दा झन्डै १४ सय जना आन्दोलनकारीको मृत्यु भएको थियो।
हसिना देश छाडेर भागेपछि नोबल पुरस्कार विजेता मोहम्मद युनुसलाई बेलायतबाट बोलाएर अन्तरिम सरकार गठन गरिएको थियो। आन्दोलनको नेतृत्वकर्ताहरू पनि सरकारमा सहभागी भएका थिए।
पछि नाहिद इस्लाम लगायतले दल नै खोलेर चुनावमा लागेका थिए। यद्यपि चुनावमा भने खराब प्रदर्शन गरेको छ।
बंगलादेशमा यसपालि बंगलादेश नेश्नलिस्ट पार्टी (बिएनपी) नेतृत्वको गठबन्धनले सरकार बनाउने निश्चित भएको छ।
मतगणना जारी रहँदा बहुमत निश्चित भएको र दुई तिहाईतर्फ अघि बढिरहेको भनेर बंगलादेशी सञ्चारमाध्यमहरुले लेखेका छन्।
यसअनुसार १७ वर्षपछि देश फर्किएका तारिक रहमान प्रधानमन्त्री बन्ने लगभग पक्का भएको छ। तारिक बंगलादेशकी पूर्वप्रधानमन्त्री खालिदा जियाका जेठा छोरा हुन्।
उनी सन् २००८ यता बेलायत बस्दै आएका थिए। गत पुसतिर मात्रै तारिक बंगलादेश आएका थिए। सन् २००७ मा तत्कालीन सरकारले पक्राउ गरेपछि उनी २००८ मा उपचारका लागि बेलायत गएका थिए। त्यसयता उनी उतै बसेका थिए।
एनसिपीसँगै जमात-ए-इस्लामी पार्टी पनि प्रतिपक्षमा बस्ने भएको छ। यो दलले धेरैमा ६० सिटसम्म जित्न सक्ने भनेर ढाका ट्रिब्युनले लेखेको छ।
बंगलादेशमा ३०० सदस्यीय प्रतिनिधि सभामा बहुमतका लागि १५१ सिट आवश्यक रहन्छ।
-1746009348.jpg)
