गण्डकी प्रदेशका सांसदहरूले शुक्रबार प्रधानमन्त्री बालेन शाहसँग भेटेर बाँदर नियन्त्रण गर्न माग राखेका छन्।
गण्डकीका ११ जिल्लाबाट निर्वाचित १८ जना सांसदले साझा समस्याका रूपमा बाँदर नियन्त्रणको माग राखेको बैठकमा सहभागी एक सांसदले जानकारी दिए।
'हामीले साझा समस्याका रूपमा सबभन्दा पहिला बाँदर नियन्त्रण गर्नुपर्यो भनेर प्रधानमन्त्रीज्यूसँग माग राख्यौं,' ती सांसदले भने।
शुक्रबार मात्रै गोरखामा बाँदरले आक्रमण गरेर एक जना किसान घाइते भएका थिए। फुजेलको ढावे गाउँमा आफ्नै बारीमा गहुँ कुर्न गएका चन्द्रप्रसाद पन्तलाई बाँदरको हुलले आक्रमण गरी घाइते बनाएको स्थानीयहरूले बताएका छन्।
खेतीपातीमा मात्र नभई मानिसलाई पनि बाँदरबाट खतरा हुन थालेको यस घटनाले जनाउँछ।
बाँदर नियन्त्रणसँगै गण्डकीका सांसदहरूले आ–आफ्ना जिल्ला र निर्वाचन क्षेत्रका समस्या प्रधामन्त्रीसमक्ष राखेको बैठकमा सहभागी एक सांसदले बताए।
प्रधानमन्त्री बालेनसँगको छलफलमा गण्डकीका सांसदहरूले पूर्वाधार निर्माणमा भइरहेको ढिलासुस्ती अन्त्य हुनुपर्ने, पोखरामा पर्यटकको बसाइ लम्ब्याउन विशेष खालका कार्यक्रम ल्याउनुपर्ने, प्राविधिक शिक्षामा जोड दिनुपर्ने, पोखरा स्वास्थ्य विज्ञान प्रतिष्ठानको स्तरोन्नति गर्नुपर्ने, गण्डकी प्रदेशमा विशिष्ट मुटु रोग अस्पताल स्थापना गर्नुपर्ने जस्ता माग राखेका थिए।
त्यस्तै, गण्डकी प्रदेशमा कृषि प्रवर्द्धन गर्न एग्रो टुरिजम अभियान चलाउने, बाँझो जग्गा सरकारले भाडामा लिएर खेतीपाती गर्न चाहने किसानलाई दिनुपर्ने, समयमा मल, बीउ र सिँचाइको व्यवस्था मिलाउनुपर्ने, कालीगण्डकीमा भइरहेको उच्च दोहन रोक्नुपर्ने जस्ता माग राखिएको बैठकमा सहभागी सांसदहरूले बताएका छन्।
स्याङ्जामा सुन्तला र कफी खेती प्रवर्द्धन गर्नुपर्ने, लमजुङमा जलविद्युत आयोजनाबाट स्थानीयलाई लाभ हुने गरी कार्यक्रम ल्याउनुपर्ने जस्ता माग पनि सांसदहरूले राखेका छन्।
उनीहरूले लिखित रूपमा लगेका माग प्रधानमन्त्री बालेनलाई बुझाएका थिए। मौखिक रूपमा आफ्ना कुरा राखेका सांसदले पनि केही दिनभित्र लिखित रूपमा उपलब्ध गराउने बताएका थिए।
छलफलमा प्रधानमन्त्री बालेनले थोरै मात्र बोलेको बैठकमा सहभागी अर्का सांसदले बताए।
'हामीले राखेका मागहरू अध्ययन गरेर तत्काल कार्यान्वन गर्छु भनेर प्रधानमन्त्रीज्यूले भन्नुभयो,' ती सांसदले भने, 'हाम्रा समस्या ध्यानपूर्वक सुनेर समाधान गर्ने वाचा गर्नुभएकाले हामीले आशावादी छौं।'
गण्डकीका १८ वटा निर्वाचन क्षेत्रमध्ये मनाङ र मुस्ताङ कांग्रेसले जितेको थियो भने म्याग्दीबाट स्वतन्त्र उम्मेदवार महावीर पुन निर्वाचित भएका थिए। बाँकी १५ वटा क्षेत्रबाट राष्ट्रिय स्वतन्त्र पार्टी (रास्वपा) का उम्मेदवार निर्वाचित भएका थिए।
छलफलपछि प्रधानमन्त्री बालेनले पहिला नीतिगत सुधार गर्ने र त्यसपछि अरू समस्या समाधान गर्न तत्काल एक्सन लिने बताएको छलफलमा सहभागी एक सांसदले जानकारी दिए।
-1775034286.jpg)
-1746009348.jpg)
