रास्वपाका सभापति रवि लामिछानेको सांसद पद निलम्बन गर्न माग गर्दै पेस भएको रिट सर्वोच्च अदालत प्रशासनले दरपीठ गरेको छ।
मंगलबार उक्त रिटलाई दरपीठ गर्ने आदेश भएको सर्वोच्च अदालतका सहरजिस्ट्रार एवं प्रवक्ता अर्जुनप्रसाद कोइरालाले जानकारी दिए।
कानुनका विद्यार्थी आयुष बडालले रवि लामिछानेविरूद्ध सम्पत्ति शुद्धीकरणको कसुर मुद्दा दर्ता रहेको हुँदा स्वत: निलम्बित हुनुपर्ने व्यवस्था रहेको दाबी गर्दै सोमबार रिट पेस गरेका थिए।
उक्त रिट अध्ययन गरी मंगलबार साँझ सर्वोच्च प्रशासनले दरपीठ गरेको हो।
निवेदकले सम्पत्ति शुद्धीकरणको कसुरमा मुद्दाको अन्तिम किनारा लागेर सफाइ पाएको अवस्था नहुँदासम्म स्वत निलम्बन हुने व्यवस्था रहेको दाबी गर्दै निलम्बनलाई निरन्तरता दिन भन्दै परमादेशको माग गरिएको थियो।
अघिल्लो प्रतिनिधि सभमा सदस्य रहँदा रवि लामिछानेविरूद्ध कास्की जिल्ला अदालतमा सहकारी ठगी, संगठित अपराध सँगै सम्पत्ति शुद्धीकरणको कसुरमा पनि मुद्दा दायर भएको थियो।
मुद्दा दायर भएपछि तत्कालीन सभामुख देवराज घिमिरेले उनलाई निलम्बनको घोषणा गरेका थिए।
यसपालि भने उनलाई निलम्बन गरिएको छैन।
-1746009348.jpg)
