नेकपा एमालेका उपाध्यक्ष विष्णु पौडेलले समयको निर्देशअनुरूप समग्र पार्टीलाई पुनर्गठन गर्न र नेपाली कम्युनिस्ट आन्दोलनलाई नयाँ ढंगले अगाडी बढाउन जरूरी रहेको बताएका छन्।
नेकपा स्थापनाको ७७ वर्षगाँठका अवसरमा शुभकामना सन्देश दिँदै उपाध्यक्ष पौडेलले सफलता र उपलब्धिको जस लिएजसरी नै पराजय र क्षतिको पनि जिम्मेवारी लिन जरूरी रहेको बताएका हुन्।
‘हामीले कुनै द्विविधा राख्नु हुँदैन, हिजोको सफलतामा हाम्रो योगदान र योग्यताको निर्णायक भूमिका थियो र आजको असफलता र पराजयमा पनि हाम्रै गल्ती, कमजोरी र अयोग्ताको निर्णायक भूमिका छ। अब हामीले अविलम्ब समग्र नेपाली कम्युनिस्ट आन्दोलनको, विशेष गरी विगतको एक दशकको र पछिल्लो पटक सरकारको नेतृत्व गर्दादेखि आम निर्वाचन सम्पन्न हुँदासम्मको वस्तुनिष्ठ र यथार्थपरक समिक्षा गर्न जरूरी छ। नीति, नेतृत्व, संगठन र कार्यशैलीमा रहेका हाम्रा गल्ति, कमजोरीहरूलाई उद्घाटित गर्न, स्वीकार गर्न र सच्याउन जरूरी छ। हामीले सफलता र उपलब्धिको जस लिएजसरी नै पराजय र क्षतिको पनि जिम्मेवारी लिन जरूरी छ। समयको निर्देशअनुरूप समग्र पार्टीलाई पुनर्गठन गर्न र नेपाली कम्युनिस्ट आन्दोलनलाई नयाँ ढङ्गले अगाडी बढाउन जरूरी छ,’ उनले भनेका छन्।
सरकारको नेतृत्व गरेको एमाले २०८२ भदौ २४ सम्म आइपुग्दा नराम्रोसँग सडकमा पछारिएको बताउँदै फागुन २१ गते सम्पन्न निर्वाचनमा नेपाली मतदाताको अत्यधिक ठूलो हिस्साले हाम्रो पार्टीलाई अस्वीकार गरेको उल्लेख गरेका छन्।
‘हामी प्रतिनिधि सभाको प्रत्यक्ष तर्फको १६५ मध्ये ९ स्थान र समानुपातिक समेत कूल २७५ मध्ये २५ स्थानमा खुम्चिन बाध्य भएका छौं,’ उनले भनेका छन्।
पार्टी स्थापनाको यस् ऐतिहासिक दिनमा नेकपा एमालेलाई लोकप्रिय, गतिशील र राष्ट्रलाई नेतृत्व गर्ने निर्णायक शक्तिमा बदल्ने संकल्प गर्नुपर्ने उनको भनाइ छ।
-1746009348.jpg)
