नेपाली कांग्रेसले सिंहदरबारभित्रबाट पक्राउ परेका नेविसंघका नेताहरूलाई रिहा गर्न माग गरेको छ।
गृहमन्त्री सुधन गुरूङको राजीनामा र मूल्यवृद्धिको विरोधमा नेविसंघका केही नेताहरूले मंगलबार प्रधानमन्त्री तथा मन्त्रिपरिषद कार्यालयनजिकै प्रदर्शन गरेका थिए। उनीहरूलाई प्रहरीले पक्राउ गरेको थियो। गृहमन्त्रीले आज पदबाट राजीनामा समेत दिइसकेका छन्।
नेपाल विद्यार्थी संघका केन्द्रीय सदस्य भुवन भट्ट, विद्यार्थी नेताहरू कुम्भराज देउवा, नविन विष्ट, आकाश देवकोटा, शुशील ऐडी र विशाल विसीलगायतलाई पक्राउ गरी थुनामा राखिएको घटनाप्रति कांग्रेसले ध्यानाकर्षण भएको जनाएको छ।
आज प्रवक्ता देवराज चालिसेले विज्ञप्ति जारी गरेर 'लोकतान्त्रिक शासन व्यवस्थामा वाक तथा प्रकाशनको स्वतन्त्रता, शान्तिपूर्ण रूपमा हिडडुल गर्ने अधिकार तथा विरोध वा असहमति व्यक्त गर्ने स्वतन्त्रता नागरिकका मौलिक अधिकारहरू रहेको र यस्ता अधिकारहरूको सम्मान र संरक्षण गर्नु राज्यको संवैधानिक तथा नैतिक दायित्व हो' भन्ने उल्लेख गरेका छन्।
यस्ता अधिकारहरूको प्रयोगका क्रममा नागरिकलाई पक्राउ गरी थुनामा राख्ने कार्यले लोकतन्त्रको आधारभूत मूल्य, विधिको शासन तथा नागरिक स्वतन्त्रताको प्रत्याभूतिमाथि गम्भीर प्रश्न खडा गर्ने कांग्रेसको भनाइ छ।
‘असहमतिलाई नियन्त्रण गर्ने र दमन गर्ने सरकारको यस्तो शैली लोकतान्त्रिक मान्यता एवं संविधानको मर्म विपरीत छ।नेपाली कांग्रेस स्पष्ट रूपमा विश्वास गर्दछ कि असहमति र विरोध लोकतन्त्रको अभिन्न अङ्ग हुन्, जसलाई दमन गर्ने होइन, संवाद र सहकार्यका माध्यमबाट सम्बोधन गरिनुपर्छ,’ उनले भने।
पक्राउ परेका नेपाल विद्यार्थी संघका नेताहरूलाई विना शर्त तत्काल रिहा गर्न कांग्रेसले माग गरेको छ।
‘भविष्यमा नागरिकहरूको मौलिक अधिकारमाथि कुनै प्रकारको अतिक्रमण गर्ने कार्य बन्द गरियोस्,’ कांग्रेसले भनेको छ।
-1746009348.jpg)
