सरकारका प्रवक्ता एवं शिक्षामन्त्री सस्मित पोखरेलले विपद पूर्वतयारीका लागि सुकुम्बासीहरूलाई सुरक्षित ठाउँमा सार्न लागिएको बताएका छन्।
शुक्रबार मन्त्रालयमा आयोजित पत्रकार सम्मेलनमा उनले काठमाडौं उपत्यकामा रहेका सुकुम्बासी वस्तीहरू बर्सेनि बाढीको प्रकोपमा पर्ने र यसपालि पनि बर्खा नजिकिँदै गरेका कारण उनीहरूको सुरक्षाका लागि स्थानान्तरण गर्न लागिएको बताएका हुन्।
'काठमाडौं उपत्यकामा तीनवटा सुकुम्बासी वस्ती छ। ती सबै हरेक वर्षजसो बाढीको प्रकोपमा पर्छन्। त्यस्तो बेलामा सामान छाडैर ज्यान जोगाउन भाग्नुपर्छ। अहिले फेरि बर्खा आउँदैछ। त्यसकारण उनीहरूलाई विपदको पूर्वतयारीका लागि सुरक्षित ठाउँमा स्थानान्तरण गर्न खोजेका हौं,' उनले भने।
मन्त्री पोखरेलले अगाडि भने, 'हामी बल प्रयोग गर्दैनौं। अनुरोध गरेर सुरक्षित ठाउँमा सार्छौं।'
सँगै पार्टीको वाचापत्रमा सरकार प्रतिबद्ध रहेको पनि उनले बताएका छन्।
सरकार गठनपछि जारी गरेको १०० बुँदे कार्यसूचीमा ६० दिनभित्र लगत संकलन, भूमिहिन सुकुम्बासी, अव्यवस्थित बसोबासीको समस्या १०० दिनभित्र समाधान गर्ने उल्लेख छ।
मन्त्री पोखरेलले स्थानान्तरण गर्ने भने पनि सरकारले भने काठमाडौं महानगरसँग समन्वय गरेर शनिबार डोजर चलाउने तयारी गरेको छ।
त्यसका लागि काठमाडौं महानगर प्रहरीले बिहीबार साँझ नै सुकुम्बासी वस्तीहरूमा माइकिङ गरेको थियो।
महानगर प्रहरीले माइकिङ गर्दा ६ वटा बुँदा भनेको छ।
पहिलो, अवैध रूपमा बनाइएका घर–टहराहरू वैशाख ११ गते साँझ ७ बजेभित्र खाली गर्नू।
दोस्रो, घर–टहरामा भएका आफ्ना सरसामान, लत्ता कपडा, घरपालुवा, पशुपंक्षी सुरक्षित स्थानमा तत्काल सार्ने व्यवस्था गर्नू।
तेस्रो, घर–टहराहरूमा बसोबास गर्ने अपांगता भएका, साना बालबालिका, गर्भवती, सुत्केरी, वृद्धवृद्धा एवं बिरामीहरूलाई प्राथमिकता दिई अन्यत्र सार्नू। यसका लागि काठमाडौं महानगरीय प्रहरी, नेपाल प्रहरी र सशस्त्र प्रहरी बलको समेत मद्दत लिनू।
चौथो, वैशाख १२ गते बिहान ६ बजेदेखि घर–टहराहरू भत्काउने र अतिक्रमित जग्गा पूर्ण रूपमा खाली गरिनेछ। यो काममा बाधा पुर्याएमा कानुन बमोजिम कारबाही गरिनेछ।
पाँचौं, सम्बन्धित मन्त्रालय तथा अन्य अधिकार प्राप्त निकायबाट वास्तविक भूमिहीन सुकुम्बासीहरूको लगत लिने र स्क्रिनिङको काम तत्कालै सुरू गरिनेछ।
र, छैटौं, १० देखि १५ दिनभित्रै यकिन भएका वास्तविक भूमिहीनलाई बसोबासको उचित प्रबन्ध गर्ने तयारी छ।
महानगर प्रहरी बल प्रमुख विष्णुप्रसाद जोशीले कसैले सूचना अटेर गरेमा संयुक्त कारबाही गर्दा भत्काइने संरचना र क्षति हुने व्यक्तिगत सम्पत्तिको जिम्मेवार आफै हुनुपर्ने पनि बताएका छन्।
'यथाशीघ्र बस्ती छाडेर सार्वजनिक स्थान खाली गरिदिन भनेका छौं। २४ घण्टाभित्र छाड्न भनेका छौं,' उनले भने, 'वैशाख १२ गते बिहान ६ बजेदेखि घर टहराहरू हटाउने र अतिक्रमित जग्गाहरू खाली गराउने काम हुनेछ।'
-1746513231.jpg)
-1746009348.jpg)
