सुकुम्बासी बस्तीमा घर भत्किएपछि त्रिपुरेश्वरस्थित रंगशाला पुगेका ८६ जनामा उच्च रक्तचाप देखिएको छ।
आइतबार दिउँसोसम्ममा ३११ परिवारले आफ्नो नाम टिपाएका छन्। उनीहरू सरसामानसहित रंगशालामा पुगेका छन्।
अधिकारसम्पन्न बागमती सभ्यता एकीकृत विकास समिति र उपत्यका विकास प्राधिकरणले उनीहरूको विवरण राखेका छन्। उपत्यका विकास प्राधिकरणले १४६ परिवारको विवरण टिपेको छ भने अधिकारसम्पन्न बागमती सभ्यता एकीकृत विकास समितिले १६५ परिवारको विवरण टिपेको छ।
यसरी नाम, परिवार संख्याको विवरण टिपाएर स्वास्थ्य जाँच गराउने मध्ये ८६ जनामा उच्च रक्तचाप देखिएको छ। रंगशालामा छुट्टै हेल्थ डेस्क समेत स्थापना गरी राखेको छ।
हेल्थ डेस्कका एक अधिकारीका अनुसार त्यहाँ पुग्ने सबैको स्वास्थ्य जाँच गराएका छन्। त्यसमध्ये ८६ जनामा उच्च रक्तचाप देखिएको हो।
उच्च रक्तचापका बिरामी रहेका उनीहरू अधिकांसले औषधि सेवन गर्ने देखिएको डेस्कका एक अधिकारीले बताए।
तर उनीहरूको औषधि त्यही बस्तीमा पुरिएको छ। हेल्प डेस्क राखिएको भए पनि ती सुकुम्बासीहरूलाई दिन औषधि भने राखिएको छैन।
यसरी दिनहुँ औषधि सेवन गरिरहेका व्यक्तिको औषधि नै पुरिएपछि उनीहरू तानवमा देखिएका छन्।
काठमाडौं उपत्यकाका विभिन्न ठाउँमा रहेका बस्तीमा सरकारले डोजर चलाउँदै बस्ती भत्काउन थालेको छ। शनिबार प्रहरीले थापाथली, सिनामंगल र मनोहरामा रहेका बस्ती भत्काउन थालेको हो।
गत बिहीबार राति बस्ती हटाइने जानकारी गराएपछि कतिपय परिवार अन्यत्र सरे। नसर्ने र सर्ने कुनै ठेगान नभएकाको हकमा काठमाडौं महानगरपालिकाले बस्ने-लगाउने व्यवस्था गर्ने भनेको छ।
शनिबार बिहान बस्ती भत्काएपछि रंगशाला पुग्नेको संख्या एकदमै कम थियो। तर अहिले त्यो संख्या बढ्नेक्रममा छ। अहिले रंगशालामा शनिबारको तुलनामा भिडभाड एकदमै बढेको छ।
शनिबार फारम भराइएकामध्ये ३१ परिवारलाई कीर्तिपुर पठाइएको थियो।
कीर्तिपुरको सत्संग भवनमा सुकुम्बासी राख्न होल्डिङ सेन्टर बनाइएको छ। ३१ परिवार बसेको होल्डिङ सेन्टरको भरिएका कारण बाँकीलाई अन्यत्रै व्यवस्थापन गरिएको थियो।
-1746009348.jpg)
