नेपाली कांग्रेसका नेता पूर्णबहादुर खड्काले आफूहरू पार्टी एकताबद्ध रहोस् भन्ने पक्षमा रहेको बताएका छन्।
धुम्बाराहीमा आज भएको भेलामा बोल्दै उनले पार्टी एकताका पक्षमा आफूहरू भए पनि त्यो कुरा नेतृत्वमा भर पर्ने बताएका हुन्।
‘हामी पार्टी एकताबद्ध होस् भन्ने चाहन्छौं, तर यो कुरा नेतृत्वको हातमा छ,’ खड्काका भनाइ उद्धृत गर्दै एक नेताले भने, ‘पार्टीका सबै पक्षलाई समेटेर लैजाने जिम्मेवारी सभापति गगन थापा र उपसभापति विश्वप्रकाश शर्माको हो, उहाँहरूले पार्टी एकताबद्ध बनाउन चाहनुपर्यो।’
नेता खड्काले सभापति गगन थापा आफ्नो निवासमा आएका बेला समसायमिक राजनीतिक घटनाक्रम र पार्टीलाई एकताबद्ध गराउने कुराकै विषयमा छलफल गरेको पनि बताएका थिए।
पार्टीलाई एकताबद्ध बनाउन सहमतिको खाका नेतृत्वले ल्याउनुपर्ने उनको भनाइ थियो।
नियमित महाधिवेशन गराउन विशेष महाधिवेशनबाट आएको अहिलेको केन्द्रीय समिति र १४ औं महाधिवेशनबाट निर्वाचित केन्द्रीय समितिलाई मिलाउनुपर्ने, १५ औं महाधिवेशन गर्न आयोजक समिति बनाउनुपर्ने, क्रियाशील व्यवस्थापनदेखि निर्वाचन समितिसम्ममा सबै पक्षको प्रतिनिधित्व हुनुपर्नेलगायत कुरा खड्काको थियो।
विशेष महाधिवेशनमा तत्कालीन सभापति शेरबहादुर देउवा पक्ष सहभागी भएको थिएन।
खड्काकै अगुवाइमा आज धुम्बाराहीमा १४ औं महाधिवेशनबाट आएका पदाधिकारी, केन्द्रीय सदस्य, प्रदेश सभापति र जिल्ला सभापतिहरूको भेला भएको हो।
उक्त भेलामा सहभागी स्याङ्जा सभापति राजु थापाले यो नियमित महाधिवेशन चाहनेहरूको छलफल रहेको बताए।
‘विशेष महाधिवेशन र नियमित महाधिवेशन चाहनेहरूबीच अब आउने बाटोलाई कसरी एकताबद्ध बनाउने भन्ने यो भेला हो,’ उनले भने, ‘कांग्रेसलाई जरा अभियानसँगै कसरी बलियो बनाउन सकिन्छ भनेर छलफल गरेको हो। यसले जरा अभियानलाई असर गर्दैन। क्रियाशील सदस्य अद्यावधिक गर्दा कति वैज्ञानिक छ भन्नेजस्ता विषयमा पनि छलफल भए।’
यो बैठक कुनै गुटको नभएको पनि उनले बताए। नियमित र विशेष महाधिवेशन चाहनेहरूलाई मिलाएर लैजानेबारे कुराकानी गरिएको उनले बताए।
भेलामा सहभागी नेता रामहरि खतिवडाले १५ औं महाधिवेशन कसरी बृहत पार्टी एकताको महाधिवेशनका रूपमा अघि लैजाने भन्नेलगायत विषयमा छलफल गरिएको बताए।
‘सबै साथीहरूलाई एकै ठाउँमा राखेर छलफल प्रारम्भ भएको छ। यसको निष्कर्ष निस्केला। कांग्रेसलाई एकताबद्ध बनाउन हामीले पहल गर्ने हो भन्ने कुरा क्षेत्रीय, जिल्ला सभापतिहरूबाट पनि आएको छ,’ उनले भने, ‘एकताबद्ध बनाउन सभापति गगन थापाकै भूमिका रहन्छ भन्ने कुरा आएको छ।’
नेता मीनबहादुर विश्वकर्माका अनुसार यो बैठकमा निर्वाचन समीक्षा, निर्वाचनमा पराजयको कारण खोज्ने, अब नेपाली कांग्रेसको १५ औं महाधिवेशन कसरी सम्पन्न गर्ने र पार्टी एकता कसरी कायम राख्ने भन्ने विषयमा देउवा समूहले छलफल गरेको बताए।
‘यो बैठकको उद्देश्य १५ औं महाधिवेशनलाई एकताको महाधिवेशन कसरी बनाउने भन्नेबारे छलफल हो,’ उनले भने।
-1777360079.jpg)
-1746009348.jpg)
