राष्ट्रिय स्वतन्त्र पार्टीले स्थानीय तह निर्वाचनका लागि उम्मेदवार छनोटको ६ आधार तयार पारेको छ।
आगामी वर्ष हुने स्थानीय तहका ३५२२१ पदको उम्मेदवारीका लागि रास्वपाले क्याण्डिडेट क्लब र लिडरसिप एकेडेमीको अनिवार्य अभ्यास गर्न लागेको छ।
स्थानीय तहका उम्मेदवार बन्न इच्छुक कुनै पनि पार्टी सदस्यले सर्वप्रथम क्याण्डिडेट क्लबमा औपचारिक रूपमा आवेदन दिनुपर्ने सहमहामन्त्री विपिनकुमार आचार्यले जानकारी दिए।
उनकाअनुसार उम्मेदवार छनोटलाई केवल प्राविधिक प्रक्रियामा मात्र सीमित नराखी वैचारिक र व्यावहारिक रूपमा सक्षम नेतृत्व निर्माणको आधार बनाउन समग्र मूल्यांकन प्रणालीमा लिडरसिप एकेडेमीको नतिजा प्रधान रहनेछ।
जसमा २५ प्रतिशत भारांक छुट्टयाइएको छ।
आकांक्षीले यस खण्डका विभिन्न सूचकहरूमा प्राप्त गरेको कुल प्राप्ताङ्कलाई ०.२५ ले गुणन गरी समग्र उम्मेदवार छनोटको २५ प्रतिशत भारांक अन्तर्गत अन्तिम नतिजामा समावेश गरिनेछ उनले बताए।
जसअन्तर्गत अनिवार्य प्रशिक्षणको प्रबन्ध छ।
उम्मेदवार छनोटको रूपरेखा तयार पार्ने कार्यदलका संयोजकसमेत रहेका आचार्यले राजनीतिक संस्कार, नीतिगत स्पष्टता, जनसेवा र स्थानीय सुशासनका विविध आयामहरूमा आकांक्षीहरूलाई पूर्वनिर्धारित मोड्युलमार्फत अनिवार्य रूपमा प्रशिक्षित गरिने बताए।
क्यान्डिडेट क्लबमार्फत जोडिएका आकांक्षीहरूलाई लिडरसिप एकेडेमीको परीक्षणमा जोडिने छ।
तोकिएको न्यूनतम मापदण्ड पार गरी उत्तीर्ण हुने आकांक्षीहरूले मात्र उम्मेदवार छनोटको अर्को चरणमा प्रवेश पाउने उनले बताए। अनुत्तीर्णहरू उम्मेदवार छनोटको बाँकी प्रक्रियाबाट स्वतः अलग हुने आचार्यले बताए।
लिडरसीप एकेडेमीलाई २५ भारांक छुट्टयाइएको उनले बताए।
त्यसपछि पोलिटिकल प्रोक्समेटीको चरण हुनेछ। त्यसमा पार्टीप्रतिको लगाव, राजनितिक आबद्धता आदि विभिन्न सूचकमा मूल्यांकन गरिनेछ। जसको मतभार पनि २५ नै हुनेछ।
त्यसपछि प्रारम्भिक निर्वाचनको खण्ड लागू हुनेछ। प्राइमरी इलेक्सनको मतभार भने ४० हुनेछ।
उम्मेदवार बनेको सम्बन्धित वडा, पालिकाभित्रका पार्टी सदस्यहरूले मत हाल्न पाउनेछन्। उनीहरूको मतभार ७५ प्रतिशत हुनेछ।
त्यस्तै त्यही निर्वाचन क्षेत्रका पालिका कमिटीका बहालवाला पार्टी सदस्य, निर्वाचन क्षेत्र, जिल्ला, प्रदेश, केन्द्रीय विभागका सदस्यहरूले पनि मत हाल्न पाउनेछन्। उनीहरूको मतभार १५ प्रतिशत हुनेछ।
यस्तै सम्बन्धित निर्वाचन क्षेत्रमै बसोबास भएका पार्टी केन्द्रीय पदाधिकारी सदस्यहरूले पनि मत हाल्न पाउनेछन्। उनीहरूको मतभार १० प्रतिशत हुनेछ।
त्यसपछि समावेशीतालाई पनि मतभार छुट्टयाइएको छ। यसको मतभार १० प्रतिशत रहेको आचार्यले बताए।
रास्वपाले अघिल्ला निर्वाचनमा पनि लिडरसिप एकेडेमी र प्राइमरी इलेक्सनको विधि अपनाउन खोजेको थियो। तर प्रभावकारी रूपमा लागू गर्न नसकेको, प्रक्रियामा पारदर्शिता नपअनाएको भन्दै उम्मेदवारहरूले नै असन्तुष्टि जनाएका थिए।
त्यस्तै रास्वपाले यसपटक स्थानीय तह निर्वाचनका लागि कुलिङ पिरियडसम्बन्धी व्यवस्था गर्न लागेको छ।
रास्वपाले स्थानीय तह निर्वाचनका लागि उम्मेदवार छनोट रूपरेखाको मस्यौदा तयार पारी सचिवालयमा बुझाएको हो।
क्यान्डिडेट क्लबमा आवेदन दिन चाहने आकांक्षीहरूको हकमा पार्टी सदस्यता प्राप्त गरेको समयावधि लागू हुने मस्यौदामा उल्लेख छ।
आफ्नो जीवनकालमै पहिलोपटक कुनै राजनीतिक दलको सदस्य बनेको अर्थात् राष्ट्रिय स्वतन्त्र पार्टी नै पहिलो राजनीतिक दल रहेको व्यक्तिको हकमा पार्टी सदस्यता प्राप्त गरेको कम्तीमा ४५ दिन पूरा भएपछि क्यान्डिडेट क्लबमा निवेदन दिन पाउने छ।
अन्य राजनीतिक दल त्याग गरी राष्ट्रिय स्वतन्त्र पार्टीको सदस्यता लिएको व्यक्तिको हकमा भने पार्टी सदस्यता प्राप्त गरेको कम्तीमा ९० दिन पूरा भएको हुनुपर्ने मस्यौदामा उल्लेख छ।
-1746009348.jpg)
