पश्चिम बंगालमा चुनावी नतिजापछि भड्किएको हिंसाबीच भारतीय जनता पार्टी (भाजपा) का नेता तथा वर्तमान विपक्षी नेता शुभेन्दु अधिकारीका निजी सहायक (पिए) चन्द्रनाथ रथको बुधबार राति गोली हानी हत्या गरिएको छ।
अन्तर्राष्ट्रिय समाचार संस्था बिबिसीका अनुसार यो घटना राजधानी कोलकाता नजिकैको मध्यमग्राम क्षेत्रमा भएको बताइएको छ।
समाचार एजेन्सीहरूले सार्वजनिक गरेका भिडिओहरूमा रथलाई गम्भीर घाइते अवस्थामा अस्पताल लगिएको देखिन्छ। आक्रमणकारीले उनी सवार गाडीमै गोली चलाएका थिए। उक्त गाडीमा विधानसभा पासको स्टिकर समेत थियो।
प्रहरीले घटनामा प्रयोग भएको गाडी नियन्त्रणमा लिएको भए पनि त्यसमा राखिएको नम्बर प्लेट नक्कली रहेको जनाएको छ।
उल्लेखनीय कुरा के भने, हालै सम्पन्न विधानसभा चुनावमा शुभेन्दु अधिकारीले भवानीपुर निर्वाचन क्षेत्रबाट तृणमूल कंग्रेस (टिएमसी) की अध्यक्ष ममता बनर्जीलाई करिब १५ हजार मतान्तरले पराजित गरेका थिए।
राज्यका डिजिपी सिद्धनाथ गुप्ताका अनुसार घटनास्थलबाट बन्दुकको गोली बरामद भएको छ र प्रत्यक्षदर्शीको बयानका आधारमा अनुसन्धान अघि बढाइएको छ।
भाजपाले यो घटनालाई 'पूर्वनियोजित हत्या' भन्दै कडा प्रतिक्रिया दिएको छ। शुभेन्दु अधिकारीले 'दुई–तीन दिनअघिदेखि नै रेकी गरिएको' दाबी गर्दै यसलाई पश्चिम बंगालमा टिएमसी शासनको 'महाजंगलराज' को परिणाम भनेका छन्।
उनले पार्टी नेतृत्वले घटनालाई गम्भीर रूपमा लिएको र परिवारसँग सम्पर्कमा रहेको बताएका छन्।
यता टिएमसीले पनि घटनाको निन्दा गर्दै निष्पक्ष अनुसन्धानको माग गरेको छ। पार्टीले विज्ञप्ति जारी गर्दै अदालतको निगरानीमा सिबिआई अनुसन्धान हुनुपर्ने माग राखेको छ।
टिएमसीले आफ्ना तीन कार्यकर्ताको पनि चुनावपछिको हिंसामा हत्या भएको दाबी गरेको छ।
४१ वर्षीय चन्द्रनाथ रथ पूर्व मेदिनीपुर जिल्लाका स्थायी बासिन्दा थिए। उनी लामो समयदेखि शुभेन्दु अधिकारीका निकट सहयोगीका रूपमा परिचित थिए र बंगालमा अधिकारीको राजनीतिक उभारमा उनको महत्त्वपूर्ण भूमिका रहेको बताइन्छ।
सक्रिय राजनीतिमा आउनुअघि उनले भारतीय वायु सेनामा करिब दुई दशक सेवा गरेका थिए। त्यसपछि केही समय निजी क्षेत्रमा काम गरेर उनी राजनीतिक समन्वय र प्रशासनिक जिम्मेवारीमा सक्रिय भएका थिए।
रथको परिवार पहिले टिएमसीसँग नजिक रहेको भए पनि पछि अधिकारीसँगै भाजपा राजनीतिमा सक्रिय भएको बताइन्छ। भवानीपुर चुनाव अभियानसहित विभिन्न महत्त्वपूर्ण राजनीतिक रणनीतिमा उनी भाजपाको कोर टोलीमा सहभागी थिए।
पार्टीभित्र अधिकारीले ठूलो जिम्मेवारी पाए रथलाई पनि प्रशासनिक भूमिकामा ल्याउन सकिने चर्चा चलिरहेको थियो।
उनको हत्यापछि पश्चिम बंगालको राजनीतिक वातावरण फेरि तनावपूर्ण बनेको छ। चुनावी नतिजापछि सुरू भएको हिंसात्मक घटनाबीच भएको हत्याले राज्यको सुरक्षा अवस्था र राजनीतिक टकरावलाई थप गम्भीर बनाएको विश्लेषण गरिएको छ।
हिंसालाई लिएर राजनीतिक आरोप–प्रत्यारोप पनि तीव्र बनेको छ। टिएमसी नेता अभिषेक बनर्जीले राज्यभर हिंसा फैलाएको आरोप भाजपामाथि लगाएका छन्। उनका अनुसार सयौं पार्टी कार्यालयमा आक्रमण भएको र धेरै उम्मेदवारका घरहरू निशाना बनाइएका छन्।
यता भाजपाले भने आफ्ना कार्यकर्ता हिंसामा संलग्न नभएको दाबी गर्दै प्रशासनसँग कडाइका साथ कारबाही गर्न माग गरेको छ।
प्रदेश अध्यक्ष शमिक भट्टाचार्यले कार्यकर्तालाई संयम अपनाउन र शान्ति कायम राख्न आग्रह गरेका छन्।
विश्लेषकहरूका अनुसार बंगालमा सत्ता परिवर्तनपछि स्थानीय वर्चस्वको लडाइँका कारण हिंसा हुने पुरानो प्रवृत्ति रहँदै आएको छ। यसपटक ठूलो मात्रामा सुरक्षाबल परिचालन हुँदाहुँदै पनि हिंसा हुनुले सुरक्षा संयन्त्रमाथि प्रश्न उठाएको छ।
उनीहरूले चेतावनी दिएका छन्, समयमै हिंसा नियन्त्रण गरिएन भने परिवर्तनको यो राजनीतिक अवस्था बदला र प्रतिशोधको चक्रमा परिणत हुन सक्छ।
यसबीच तृणमूल कंग्रेस (टिएमसी) की अध्यक्ष बनर्जीले निर्वाचनमा आफ्नो दलको हारपछि पनि मुख्यमन्त्री पदबाट राजीनामा नदिने घोषणा गरेकी छन्। भाजपाले चुनावमा बेइमानी गरेको उनको आरोप छ।
-1746009348.jpg)
