नेपाली कांग्रेसका नेता शेखर कोइरालाको निर्वाचन क्षेत्र मोरङ ६ का उनीनिकट नेता-कार्यकर्ताहरूले पार्टीको क्रियाशील सदस्यता अद्यावधिक प्रक्रियामा सहभागी नहुने अडान लिएका छन्।
धनकुटाको नाम्जेमा आयोजित एक भेलामार्फत कोइराला समूहका स्थानीय नेताहरूले यस्तो निर्णय लिएका हुन्।
यो भेला हुनुभन्दा दुई दिन अगाडि मात्रै संस्थापन पक्षले भेडेटारमा प्रदेशस्तरीय भेला आयोजना गरी सदस्यता अद्यावधिकको अभियान चलाउने निर्णय गरेको थियो।
शेखरनिकट मानिने सबै नेताहरू भने यो निर्णयमा एकमत देखिँदैनन्।
सुनसरीका कांग्रेस केन्द्रीय सदस्य राजीव कोइराला र विराटनगरका थुप्रै कार्यकर्ताहरूले धमाधम आफ्नो सदस्यता अद्यावधिक गराइरहेका छन्।
मोरङ जिल्ला सभापति डिगबहादुर लिम्बूले पनि जिल्लाभर अद्यावधिक कार्य तीव्र गतिमा अघि बढिरहेको र सबैले यसमा भाग लिने दाबी गरेका छन्। तर विराटनगर महानगरपालिकाका मेयर एवं मोरङ कांग्रेसका उपसभापति नागेश कोइरालाको मत भने फरक छ।
नाम्जेमा भएको अनौपचारिक जमघटबारे जानकारी दिँदै उनले भने, ‘केही महिना पहिले मात्रै नवीकरण गरिएकाले अहिले नै फेरि अद्यावधिक गरिरहनु आवश्यक छैन भन्ने हाम्रो बुझाइ हो। हाम्रा नेता शेखर कोइरालाले निर्देशन नदिएसम्म हामी यो प्रक्रियामा सामेल हुँदैनौं। उहाँकै आग्रहमा अहिलेसम्म हामी रोकिएका हौं।’
नाम्जे भेलामा मोरङ ६ का क्षेत्रीय सभापति देवराज तामाङ, विराटनगर महानगर सभापति दीपक चापागाईं तथा विभिन्न वडाका सभापतिहरूको उपस्थिति थियो।
कांग्रेसमा सदस्यता अद्यावधिक नगर्ने रणनीतिमा शेखर पक्ष मात्र एक्लो छैन। एक साताअघि विराटनगरमै भेला गरेर पूर्वसभापति शेरबहादुर देउवा पक्षले पनि यो प्रक्रिया रोक्ने निर्णय गरेको थियो।
उक्त भेलामा कृष्णप्रसाद सिटौला, मीन विश्वकर्मा, कोशीका पूर्वमुख्यमन्त्री केदार कार्की, मन्त्री भीम पराजुली, पूर्वकेन्द्रीय सदस्यहरू लक्ष्मी खतिवडा, सीता खतिवडा, सुनिता गच्छदार, सुनिता गुरूङ र भोला राजवंशी लगायतका नेताहरूको उपस्थिति थियो।
विशेष महाधिवेशनबाट चुनिएर आएको नयाँ नेतृत्वलाई देउवा, कोइराला र सिटौला समूहले स्वीकार्न सकेको छैन। अदालतले गगन थापा नेतृत्वको कांग्रेसलाई वैधानिकता दिएपछि देउवा र शेखर पक्षबीच दूरी बढेको थियो, तर सदस्यता अद्यावधिक गर्ने मुद्दामा अहिले यी दुवै पक्ष पुनः एक ठाउँमा आइपुगेका छन्।
१४औँ महाधिवेशनमा देउवाविरुद्ध सभापतिको प्रतिस्पर्धा गरेका शेखर कोइराला पछि विशेष महाधिवेशनको मुद्दामा गगन थापा र विश्वप्रकाश शर्मासँग नजिकिएका थिए। तर विशेष महाधिवेशन हुनुअगावै उनी देउवा पक्षतिर ढल्किएका थिए।
त्यसबेला विशेष महाधिवेशनको नेतृत्व गर्ने तत्कालीन महामन्त्रीद्वय गगन र विश्वप्रकाश शर्मालाई देउवा समूहले पार्टीको साधारण सदस्यबाटै पाँच वर्षका लागि निष्कासन गर्दा शेखर समूहले त्यस कदमलाई मौन समर्थन गरेको थियो।
यद्यपि, निर्वाचन आयोगले थापा नेतृत्वको समितिलाई नै आधिकारिकता दिएपछि देउवा र शेखर दुवै पक्षले बाध्य भएर गगन थापाकै हस्ताक्षर भएको टिकट लिई निर्वाचन लडेका थिए। गत पुस महिनामा सम्पन्न कांग्रेसको विशेष महाधिवेशनलाई भने देउवा र शेखर दुवै समूहले बहिष्कार गरेका थिए।
