नेकपा (एमाले) का महासचिव शंकर पोखरेलले मुलुकको कार्यकारी भूमिकामा रहेका व्यक्तिहरूका गतिविधिहरूले राज्य सञ्चालनको विषयलाई बालबालिकाहरूले खेल्ने भाँडाकुटी जस्तो बनाइएको टिप्पणी गरेका छन्।
सोमबार प्रेस चौतारी नेपालले रूपन्देहीमा आयोजना गरेको कार्यक्रममा बोल्दै महासचिव पोखरेलले यस्तो टिप्पणी गरेका हुन्।
उनले राज्यको जिम्मेवार ओहोदामा बस्ने व्यक्ति अझै संयमित र जिम्मेवार हुनुपर्नेमा सत्ता सञ्चालनलाई मजाकको विषय बनाइएको टिप्पणी पनि गरे।
सरकारका यस्ता गतिविधिहरूले मुलुकको लोकतान्त्रिक व्यवस्थाको भविष्यमाथि समेत संकट उत्पन्न भएको उनको भनाइ छ।
उनले विद्यार्थी संगठन, ट्रेड युनियन, व्यावसायिक संगठन र सञ्चारमाध्यममाथि राज्यको नियन्त्रण बढ्दै गएको समेत बताए।
उनले लोकतन्त्रको आधार संगठित हुने र अभिव्यक्ति स्वतन्त्रताको अधिकार भए पनि पछिल्लो समय विद्यार्थी संगठनका गतिविधि प्रतिबन्धित गर्ने, विश्वविद्यालय तथा क्याम्पसमा ट्रेड युनियन अधिकार नियन्त्रण गर्ने र व्यावसायिक संगठनलाई समेत गतिविधि नगर्न निर्देशन दिने काम भइरहेकोप्रति आपत्ति जनाए।
उनले सरकार आफै बाह्य शक्तिहरूको खेलौना बनेको हो कि भन्ने आशंका मुलुकभित्र मात्र नभई मुलुकबाहिरका छिमेकीहरूमा समेत उत्पन्न भएको टिप्पणी गरे।
उनले भने, ‘अहिले मुलुकको लोकतन्त्रको भविष्यमाथि पनि संकट उत्पन्न भएको छ। लोकतन्त्रको आधार भनेको संगठित हुने र आफ्ना कुराहरू अभिव्यक्त गर्ने अधिकारकारको रूपमा बुझिन्छ। अहिले नेपालको लोकतान्त्रिक आन्दोलनका फाउन्डेसनका रूपमा रहेका विद्यार्थी संगठनको गतिविधिलाई प्रतिबन्ध लगाउने काम भएको छ। विश्व विद्यालयहरूमा, क्याम्पसहरूमा, ट्रेड युनियनहरूको अधिकारलाई नियन्त्रण गर्ने काम भएको छ। अस्ति मात्रै मैले एउटा समाचार पढ्दै थिएँ। गृह मन्त्रालयको आदेश भनेर व्यावसायिक संगठनहरूलाई पनि रोक लगाउने काम भएको छ। प्याब्सनलाई समेत अब तिमीहरू गतिविधि नगर भनेर खेलेको पत्र पढिरहेको थिएँ।’
उनले अगाडि भने, ‘पत्रकारहरूका सन्दर्भको कुरा गर्दाखेरि त अब मिडिया हाउसबाटै पत्रकारलाई काम गर्दागर्दै गिरफ्तार गरेका कुराहरू त हामी सुनिरहेकै छौँ। प्रधानमन्त्रीका प्रमुख सल्लाहकार भन्दै गर्नुहुन्छ कति जनाको सूचीमा तिम्रो नाम परेन भने त तिमी के पत्रकार ? भनेर चाहिँ पत्रकारहरूलाई मेन्सन गर्नुहुन्छ। राज्य यस्तो प्रकारको ठट्टा मजाकको विषय बन्न सक्दछ ? जति जिम्मेवार ओहदामा भयो त्यति ज्यादा संयमित र जिम्मेवार हुनुपर्दछ। तर आज हाम्रा मुलुकका कार्यकारी भूमिकामा रहेका मान्छेहरुका सोसल मिडियाका गतिविधिहरु हेर्ने हो पढ्ने हो भने, राज्य बालबालिकाहरूले खेल्ने भाँडाकुटी जस्तो विषय बनाइएको छ। राज्य राज्य जस्तो छैन, सरकार सरकार जस्तो छैन । जसले हाम्रो लोकतन्त्रलाई पनि कमजोर बनाइराखेको छ र संविधान र संवैधानिक अंगहरु एक प्रकारले निष्क्रिय बनेका छन्।’
भूराजनीतिक द्वन्द्वमा नेपाल सरकार र त्यसको नेतृत्व जुन हिसाबले परिचालित भइरहेको छ त्यसले मुलुकको संवेदनशील भूराजनीतिलाई जोखिममा पारेको उनको भनाइ छ । –न्युज एजेन्सी नेपाल
