नेपाली कांग्रेसका उपसभापति विश्वप्रकाश शर्माले प्रधानमन्त्री बालेन शाहले संसदको रोस्ट्रमबाट दिएको अभिव्यक्तिको आसय हिसाब बराबर भन्ने हो भन्ने प्रश्न गरेका छन्।
पार्टीको केन्द्रीय नीति, अनुसन्धान तथा प्रशिक्षण प्रतिष्ठानले लुम्बिनी प्रदेशमा गरेको कार्यक्रममा बोल्दै उपसभापति शर्माले भने, ‘प्रधानमन्त्रीको अभिव्यक्तिको आसय के हिसाब बराबर भन्ने हो? हामीले पनि मिचेका कारण अब जे भयो, जसो भयो सबै विर्सेर अघि बढौं भन्ने हो? नेपालले सीमा मिच्यो भनेर भारतले कहिल्यै भनेको छैन, देशको प्रधानमन्त्रीले आफै हामीले सीमा मिचेका छौं भन्नु संसारमै नभएको घटना हो l’
उनले सत्तारूढ रास्वपा सभापति रवि लामिछाने आज भारतको दिल्लीमा रहेको उल्लेख गर्दै भने, ‘हिजो टिभी कार्यक्रम चलाउँदा आवेगसाथ राखेको नक्सा आज संयमसाथ सम्झिनुहुन्छ कि सम्झिनु हुन्न? राष्ट्रियताको प्रश्न आवेग, उत्तेजना र हलुका प्रस्तुतिको विषय हो कि गहन, एक्यवद्ध र शान्त कुटनितिको प्रश्न?’
उनले प्रधानमन्त्रीको अभिव्यक्तिमा विषयमा रास्वपा सांसदहरू मौन रहेको उल्लेख गरेका छन्।
‘मुखमा बुजो लगाएर बसेका सांसदहरू देख्दा टिठ लागेको छl म शोध्न चाहन्छु- के सांसदको पद देशको इज्जत भन्दा ठूलो हो? राष्ट्रिययताको पक्षमा बोल्न लोकतान्त्रिक अधिकार विहिन छन् रास्वपाका सांसदहरू?’
कांग्रेसले प्रधानमन्त्रीको उक्त अभिव्यक्ति रेकर्डबाट हटाउनुपर्ने र प्रधानमन्त्रीले संसदमा उभिएर माफी माग्नुपर्ने अडानसमेत राख्दै आएको छ। प्रधानमन्त्रीले 'नेपालले भारतको जग्गा मिचेको रहेछ' भन्ने अभिव्यक्ति दिएका थिए।
