प्रगतिशील लोकतान्त्रिक पार्टीले आगामी असोज ११ देखि १३ गतेसम्म काठमाडौंमा प्रथम एकता महाधिवेशन गर्ने निर्णय गरेको छ।
पार्टीको जेठ १६ र १७ गते ललितपुरमा बसेको सचिवालयको विस्तारित बैठकले उक्त निर्णय गरेको हो।
बैठकले हालको २९९ सदस्यीय केन्द्रीय समितिलाई मूल महाधिवेशन आयोजक समितिमा रूपान्तरण गर्ने तथा महाधिवेशन सम्पन्न गर्न २७ सदस्यीय सचिवालय गठन गर्ने निर्णयसमेत गरेको पार्टी अध्यक्ष सन्तोष परियारद्वारा जारी प्रेस वक्तव्यमा उल्लेख छ।
सचिवालयमा प्रदेश इन्चार्ज, विभागीय प्रमुख तथा पार्टी निर्माणमा योगदान दिएका नेताहरूलाई समेटिने उल्लेख छ।
पार्टीले विभिन्न शक्ति र समूहमा रहेका वामपन्थी तथा प्रगतिशील समाजवादी शक्तिसँग एकता र ध्रुवीकरणका लागि पहल अघि बढाउने निर्णय पनि गरेको छ। त्यसका लागि अध्यक्ष परियारको नेतृत्वमा जनार्दन शर्मा, राम कार्की, डा. जनक शाह, कृष्णा केसी र जटिल कार्की सदस्य रहेको ६ सदस्यीय राजनीतिक संवाद समिति गठन गरेको पार्टीले जानकारी दिएको छ।
बैठकले पार्टी परित्याग गरेका १४ केन्द्रीय सदस्यलाई हालसम्मको सहकार्यका लागि धन्यवाद दिँदै आगामी यात्राको सफलताको शुभकामना व्यक्त गरेको छ। रिक्त पदबारे निर्वाचन आयोगलाई जानकारी गराउने निर्णयसमेत गरेको छ।
पूर्वप्रधानमन्त्री डा. बाबुराम भट्टराईले पार्टीका सांगठनिक गतिविधिमा सहभागी नहुने जानकारी दिएपछि पार्टीले सम्मानपूर्वक बिदाइ गरेको उल्लेख गर्दै वक्तव्यमा पछिल्लो समय उनले पार्टी नेतृत्वमाथि गरेको टिप्पणीप्रति खेद व्यक्त गरिएको छ।
बैठकले उक्त टिप्पणीलाई 'अराजनीतिक र स्तरहीन' भन्दै खारेज गर्ने निर्णय गरेको जनाएको छ।
त्यसैगरी, प्रतिनिधिसभाको जेठ १७ गतेको बैठकमा सीमा विवादबारे प्रधानमन्त्री वालेन्द्र (बालेन) शाहले दिएको अभिव्यक्तिप्रति पनि पार्टीले गम्भीर आपत्ति जनाएको छ।
आर्थिक वर्ष २०८३/८४ को बजेटबारे टिप्पणी गर्दै पार्टीले संविधानले परिकल्पना गरेको समाजवाद उन्मुख अर्थतन्त्रको मर्मविपरीत स्वास्थ्य, शिक्षा र विद्युत् क्षेत्रमा कर लगाएर जनतामाथि आर्थिक भार थपिएको आरोप लगाएको छ।
सुकुम्बासीलाई व्यवस्थापनबिनै अलपत्र पारिएको भन्दै निम्न वर्ग र समुदायमाथि विभेद गरिएको निष्कर्ष बैठकले निकालेको छ।
