राप्रपा परित्याग गरेका धवलशम्शेर राणाले पार्टीको वैधानिकता हिजोदेखि सकिएको बताएका छन्।
अध्यक्ष राजेन्द्र लिङ्देनले एक अपिल जारी गर्दै राणालाई राप्रपा महाधिवेशनमै जुट्न आग्रह गरेपछि उनले जबाफी विज्ञप्ति जारी गर्दै राप्रपाको वैधानिकता जेठ १९ गतेदेखि सकिइसकेको उल्लेख गरेका हुन्।
राप्रपाले २०७८ मा महाधिवेशन गरेको थियो। विधानअनुसार चार वर्ष कार्यकाल रहन्छ। विशेष परिस्थितिमा एक वर्षसम्म कार्यकाल थप गर्न सकिने व्यवस्थाअनुसार गत मंसिरमा ६ महिना कार्यकाल थपिएको थियो। उक्त समय जेठ १९ गते सकिएको राणाको भनाइ छ।
‘केन्द्रीय कार्यसमितिले थप गरेको उक्त अतिरिक्त ६ महिनाको अवधि पनि हिजो जेठ १९ गते समाप्त भएको छ, पार्टीले वैधानिकता गुमाएकाे छ,’ उनले भनेका छन्।
यस्तो छ राणाको अपिल-
राप्रपाकाे एकता महाधिवेशनबाट निर्वाचित केन्द्रीय कार्यसमितिकाे नियमित कार्यकाल गत मंसिरमा पूर्ण हुने र समयावधि भित्र महाधिवेशन सम्पन्न गर्नुपर्ने वैधानिक बाध्यताका कारण एक वर्ष पहिले उपाध्यक्ष हेमजंग गुर"ङकाे संयाेजकत्वमा महाधिवेशन सुझाव समिति गठन भएकाे थियो। मलाई सदस्य राखिएकाे थियाे।
उक्त सुझाव समितिले गत निर्वाचनलाई मध्यनजर गरि निर्वाचन ढिला भएमा मंसिरमा र छिटाे भएमा यही जेष्ठ महिनाभित्र महfधिवेशन सम्पन्न गर्न सुझाव दिएकाे थियो। उक्त सुझाव कार्यसम्पादन एवं केन्द्रीय कार्यसमितिले पारित गर्दै केन्द्रीय कार्यसमितिकाे समयावधि ६ महिना थप गरेकाे थियो।
केन्द्रीय कार्यसमितिले थप गरेको उक्त अतिरिक्त ६ महिनाको अवधि पनि हिजो जेठ १९ गते समाप्त भएको छ, पार्टीले वैधानिकता गुमाएकाे छ ।
दर्जनाैं पटक अैापचरिक तथा अनाैपचारिक वैठकहरूमा त्यससम्वन्धमा दिएका सुझाव र सल्लाह कहिले स्वीकार नगर्ने, वैधानिक निर्णय कार्यान्वयन नगर्ने पुरानै प्रवृति ढाकछाेप गर्न, मलाई 'महाधिवेशनको जिम्मा दिएकाे र जिम्मेवारीबाट पन्छिएकाे या भागेकाे' भन्ने प्रकारकाे दुष्प्रचारपूर्ण अभिव्यक्ति राप्रपा अध्यक्षबाट लिखितरूपमा आउनु हास्यास्पद छ। आफ्ना कमीकमजाेरी अरुमाथि लादेर, चाेखाे बन्ने निर्लज्ज र गैरजिम्मेवार शैलीको प्रमाण हाे यो।
नेतृत्वकाे यस्तै गैरजिम्मेवार शैली र आत्मकेन्द्रित प्रवृत्तिका कारण गत चुनावमा पार्टीले आफ्नाे शाख मात्र गुमाएन, हाम्रा वैचारिक मूल्य मान्यता तथा सैद्धान्तिक आधार समेत धरापमा पर्यो। साथै पार्टी जनताबाट तिरष्कृत बन्यो । जसका कारण पार्टीका सयौं साथीहरू पार्टी छाेडेर अन्यत्र गए र मक्किएकाे घर अलपत्र बन्यो।
जहाँ विश्वासका संकट हुन्छ त्यहाँ लक्ष्यको मार्ग अवरूद्ध हुन्छ। हाम्रा मूल्य र मान्यता स्थापित हुने संभावना क्षीण भएको अवस्थामा, अध्यक्षको विज्ञप्तिकाे भ्रममा नपरी सम्पूर्ण राष्ट्रवादी मन तथा शक्तिहरुकाे आपसी मेल र एकताबाट नयाँ राष्ट्रवादी शक्ति निर्माणको अभियानमा जुट्न सबै राष्ट्रवादी समूह, दल, अभियान तथा महानुभावहरूमा हार्दिक अपिल गर्दछु। आउनुहाेस् निस्वार्थभावले एक प्रजातान्त्रिक र लक्ष्यप्रति इमानदार, विश्वसनीय राष्ट्रवादी शक्ति निर्माण गराैं।
यो पनि- लिङ्देनसँग डेढ वर्ष भिडेर निस्किए धवल शम्शेर, दुर्गा प्रसाईंसँग मिलेर नयाँ पार्टी बनाउने
