उपराष्ट्रपति कार्यालयका सचिव कृष्णहरि पुष्करलाई काठमाडौं उपत्यका अपराध अनुसन्धान कार्यालयले बिहीबार दिउँसो नियन्त्रणमा लिएर राति १० बजे छाडेपछि उनलाई किन त्यस्तो व्यवहार गरियो भन्ने चासोको विषय बनेको छ।
पुष्करले प्रधानमन्त्री बालेन शाहको निजी नम्बरमा 'राजदूतका लागि आवेदन दिन चाहेकाले आवश्यक मार्गनिर्देशन पाऊँ' भन्दै मेसेज गरेको स्रोतहरूले दाबी गरेका छन्।
यसरी बहालवाला सचिवले प्रधानमन्त्रीलाई मेसेज पठाएकै कारण प्रहरी प्रशासनले नियन्त्रणमा लिएर सोधपुछ गर्न मिल्छ कि मिल्दैन?
के प्रधानमन्त्रीको निजी मोबाइल नम्बरमा मेसेज पठाउनु भनेको प्रहरीले नियन्त्रणमा लिएर केरकार गर्नुपर्ने खालको अपराध हो? प्रहरीले कसको निर्देशन र के आधारमा सचिव पुष्करलाई नियन्त्रणमा लियो?
हामीले यही सन्दर्भमा गृहसचिव राजकुमार श्रेष्ठसँग कुराकानी गरेका छौं।
हिजो उपराष्ट्रपति कार्यालयका सचिव कृष्णहरि पुष्करलाई प्रहरीले नियन्त्रणमा लिएर फेरि छाडेको रहेछ। किन रहेछ?
यो विषय जसरी बाहिर आएको छ, त्यस्तो होइन। पक्राउ गरेको, नियन्त्रणमा राखेको भन्ने होइन। उहाँले प्रधानमन्त्रीज्यूलाई मोबाइलमा मेसेज गर्नुभएको रहेछ। त्यसबारे बुझ्न बोलाइएको मात्र हो।
उहाँले प्रधानमन्त्रीलाई के मेसेज गर्नुभएको रहेछ?
त्यो चाहिँ मैले पनि देख्या छैन, सुनेको मात्र कुरा हो। पर्सनल विषयको मेसेज हो।
कुनै सचिवले प्रधानमन्त्रीलाई मेसेज पठाउने बित्तिकै प्रहरीले नियन्त्रणमा लिनुपर्ने मामिला हो र?
प्रहरीले नियन्त्रणमा लिएको होइन। सोधपुछ, जानकारी लिने कुरा मात्र हो। सोधपुछ गर्नु त सामान्य नै कुरा हो।
उहाँ त बहालवाला सचिव हो। पर्सनल मेसेज थियो भने त यो मेसेज किन गर्नुभएको भनेर प्रधानमन्त्रीले बोलाएर सोध्न सक्नुहुन्थ्यो नि होइन?
मेसेज आएपछि कि आफैले बुझ्ने कुरा हुन्छ कि अर्कालाई के रहेछ बुझिदेऊ भन्ने कुरा हुन्छ। त्यही मात्र हो।
प्रहरी घरमै लिन गएर, प्रहरी कार्यालयमा ल्याएर, धेरै समय कार्यालयमै राखेर सोधपुछ गरेपछि प्रहरीकै नियन्त्रण भएन र? प्रहरीले सोधपुछ गरेपछि थप कारबाही गर्न मिल्ने नदेखेर छाडिदिएको भन्ने छ नि?
यो सबै प्रस्तुति गर्ने तरिका र शब्दको प्रयोगमा भर पर्ने कुरा हो। मैले बुझेको चाहिँ सचिवज्यूको मेसेज किन र केका लागि थियो भन्ने बुझ्न मात्र खोजिएको हो।
यसलाई कारबाही गर्ने हिसाबले हेरिएको होइन। यसबारे पुष्कर सरलाई नै सोध्नुभयो भने अझ स्पष्ट हुन्छ।
प्रधानमन्त्रीलाई मेसेज आएपछि उहाँले तपाईंलाई भनेर तपाईंको निर्देशनमा प्रहरी परिचालन भएको हो?
त्यस्तो होइन।
त्यसो भए प्रधानमन्त्री कार्यालयबाट चेनअफ कमान्ड अनुसार यो मेसेज गएको होइन? एकैचोटि प्रहरी कसरी पुग्यो त कृष्णहरि पुष्करको घरमा?
उहाँलाई उपस्थित हुन आउनू भन्ने सूचना दिन त पक्कै उच्च तहको प्रहरी गएन होला।
बहालवाला सचिवलाई सोधपुछ गर्न प्रहरीमा बोलाउने कुरा त चेनअफ कमान्ड अनुसार गृहसचिव, प्रहरी प्रमुख हुँदै तल्लो निकायमा खबर जानुपर्ने होला नि? कि प्रधानमन्त्रीले तल्लो तहको प्रहरीलाई सिधै फोन गरेर सचिवलाई बोलाएर ल्याऊ भन्नुभयो?
अब यसबारे मैले केही भनिनँ। मैले भन्ने कुरा यत्ति हो, जसरी बाहिर सचिवलाई नियन्त्रणमा लिइयो, पक्राउ गरियो भनेर समाचार आएको छ, त्यस्तो होइन। सामान्य सोधपुछ हो। अब प्रहरीले खबर गरेर ल आउनु यस्तो बुझ्नुपर्ने छ भन्यो भने त जो कोही पनि जानुपर्छ म आफै पनि जानुपर्छ।
सचिवले गरेको सामान्य मेसेज भए के कुरा हो बुझ्न मन लागे प्रधानमन्त्रीले आफै बुझ्ने, चित्त नबुझे आफै सचेत गराउनुपर्ने होइन र?
यस्तो हुन्छ, मलाई कसैले केही कुरा मेसेज गर्यो। त्यसबारे किन रहेछ भनेर बुझ्ने दुईवटा बाटो हुन्छ। एउटा म आफैले सोध्न सक्छु, अर्को चाहिँ अरू मान्छेलाई के रहेछ बुझिदेऊ भन्न सक्छु।
अरू मान्छेलाई बुझ्न लगाउने र प्रहरी प्रशासन लगाउने कुरा एउटै हो र?
अब यति यति नै गरौं। अरू जति कुरा भए पनि यस्तै हो।
