राष्ट्रिय स्वतन्त्र पार्टी (रास्वपा) का सभापति रवि लामिछानेले आवश्यक परे परराष्ट्र मन्त्रीले सीमाका विषयमा संसदबाटै प्रष्टीकरण दिने कुरा सर्वदलीय बैठकमा राखेका छन्।
लामिछानेको आह्वानमा निर्वाचनपछि पहिलो पटक आज सिंहदरबारमा सर्वदलीय बैठक बसेको थियो। उक्त बैठकमा संसदमा देखा परेको गतिरोध अन्त्यका लागि पनि छलफल भएको थियो।
प्रधानमन्त्री बालेन शाहले प्रतिनिधि सभा बैठकबाटै 'नेपालले पनि भारतको जग्गा मिचेको रहेछ' भन्ने अभिव्यक्ति दिएका थिए। उक्त अभिव्यक्ति पुष्टि हुने प्रमाण दिन वा रेकर्डबाट उक्त अभिव्यक्ति हटाउन प्रतिपक्षी दलहरूले माग गर्दै आएका छन्।
आजको सर्वदलीय बैठकमा श्रम संस्कृति पार्टीबाहेक अरू प्रतिपक्षी दलहरू पनि सहभागी थिए।
यो बैठकमा सभापति लामिछानेले संसदमा देखिएको गतिरोध निराकरण गरेर जान दलहरूसँग आग्रह गरेका हुन्।
‘सदन अवरूद्ध हुने अवस्थालाई निराकरण गरेर जानुपर्छ भन्ने कुरा सभापतिज्यूबाट अनुरोध भयो। सरकारका तर्फबाट परराष्ट्र मन्त्रालय, परराष्ट्र मन्त्रीले प्रष्टाउने केही कुरा राखेको छ, आवश्यक पर्छ भने त्यो कुरा सदनमा पनि राख्न सकिन्छ भन्ने कुरा सभापतिले राख्नुभएको थियो,’ महामन्त्री कबिन्द्र बुर्लाकोटीले भने, ‘अरू दलहरूले छलफल गरेर मात्र अघि बढौं भन्नुभएको छ।’
-ink-1780891642.jpeg)
