नेपाली कांग्रेसले सुदूरपश्चिम सरकारमा पाँच जना नयाँ मन्त्रीहरू नियुक्त गरेको छ।
कांग्रेस संसदीय दलका नेता समेत रहेका मुख्यमन्त्री कमलबहादुर शाहले सोमबार बेलुकी पार्टीको तर्फबाट पाँच जना नयाँ मन्त्रीहरू नियुक्त गरेका हुन्।
मुख्यमन्त्री शाहले आर्थिक मामिला मन्त्रीमा विक्रमसिंह धामी, राज्यमन्त्रीमा जुना दानी, उद्योग पर्यटन तथा वन वातावरण मन्त्रीमा मानबहादुर रावल, सामाजिक विकास मन्त्रीमा बेलबहादुर राना मगर र राज्य मन्त्रीमा मधु भारतीलाई नियुक्त गरेका हुन्।
नवनियुक्त मन्त्रीहरूले केहीबेरमा पद तथा गोपनीयाको शपथ लिने तयारी भइरहेको स्रोतले बतायो।
आइतबार कांग्रेस संसदीय दलका नेता तथा मुख्यमन्त्री कमलबहादुर शाहको अध्यक्षतामा बसेको बैठकले हाल मन्त्रीमा सामेल व्यक्तिहरूलाई फिर्ता बोलाउने र नयाँलाई पठाउने निर्णय गरेको थियो।
यसअघि शाह नेतृत्वको सरकारमा कांग्रेसबाट बलबहादुर सिंह थापा आर्थिक मामिला मन्त्री, मेघराज खड्का सामाजिक विकास मन्त्री, शिवराज भट्ट उद्योग, पर्यटन, वन तथा वातावरण मन्त्री, प्रकाश बम आर्थिक मामिला राज्यमन्त्री र सरस्वती खड्का सामाजिक विकास राज्यमन्त्री थिए। उनीहरूलाई सबैलाई सोमबार मात्रै बिदाई गरिएको थियो।
कांग्रेस भित्रको आन्तरिक खटपटका कारण मुख्यमन्त्री शाह पुराना मन्त्रीलाई निकालेर नयाँ मन्त्री नियुक्त गर्न बाध्य भएका हुन्। मुख्यमन्त्री शाहलाई पदबाट हटाउन तथा संसदीय दलको नेताबाट हटाउन कसरतहरू पार्टीभित्रैबाट सुरू भएका थिए। त्यसको व्यवस्थापन उनले तत्कालका लागि मन्त्रीहरू फेरबदल गर्दै साम्य पारेका छन्।
नेकपा (एमाले) बाट हाल शाह नेतृत्वको सरकारमा रहेका सबै हालका मन्त्रीहरूलाई फिर्ता बोलाउने तयारी छ।
सोमबारसम्म सत्ता साझेदार दुबै दलमा त्यस्तो सहमति बने पनि एमालेले नयाँ मन्त्रीहरूको लिष्ट उपलब्ध गराउन सकेन। त्यसैले एमालेका मन्त्रीहरू सोमबार नै परिवर्तन हुने छैनन्।
स्रोतका अनुसार एमालेका मन्त्रीहरू अब बजेटपछि मात्रै परिवर्तन गरिने छन्।
हाल शाह नेतृत्वको सरकारमा एमालेबाट वीरबहादुर थापा भूमि व्यवस्था, कृषि तथा सहकारी मन्त्री, सुरेन्द्रबहादुर पाल भौतिक पूर्वाधार विकास मन्त्री, हिरा सार्की आन्तरिक मामिला तथा कानुन मन्त्री र निर्मला देवी साउद भौतिक पूर्वाधार विकास राज्य मन्त्री छिन्।
सुदूरपश्चिम सरकारमा कांग्रेसका मुख्यमन्त्री शाह सहित हाल १० जनाको मन्त्रिपरिषद छ। शाह २०८१ साउन २० गते मुख्यमन्त्रीमा नियुक्त भएका थिए। शाह पहिलो पटक २०७९ माघ २६ गते मुख्यमन्त्री बनेका थिए।
सुदूरपश्चिम प्रदेश सभामा कांग्रेसका १८ र एमालेका ११ सांसदहरू छन्। बहुमतका लागि २७ सांसद आवश्यक पर्ने हुँदा दुई ठूला दल कांग्रेस र एमाले मिले संख्या पर्याप्त छ। सुदूरपश्चिम प्रदेश सभामा कुल ५३ जना प्रदेशसभा सदस्य थिए। त्यसमध्ये फागुन २१ गतेको निर्वाचनमा पदबाट राजीनामा दिएर १ जना निर्वाचनमा लडेका थिए।
यहाँ राष्ट्रिय प्रजातन्त्र पार्टीबाट एक जना समानुपातिक सांसद छन्। पछिल्लो समय नाउपा, समाजवादी लगायतका दलहरू नेकपामा समायोजित भएपछि बाँकी २१ जना सांसद नेकपाका पक्षमा छन्।
