नेपाली कांग्रेसले गत पुससम्म नवीकरण र नयाँ वितरण गरिएका क्रियाशील सदस्यहरूको अद्यावधिक कार्य अन्तिम चरणमा पुर्याएको छ। जेठ २८ गते मध्यरातसम्म अद्यावधिक गर्न मिल्छ।
कांग्रेसले कस्ता सदस्यको विवरण अद्यावधिक गरेको हो, त्यस्ता सदस्य कति थिए र सबैले अद्यावधिक गरे वा गरेनन् भन्ने चासो छ।
गत पुसमै नियमित महाधिवेशन गर्ने भनेर शेरबहादुर देउवा सभापति र गगन थापा महामन्त्री हुँदाका बेला नवीकरण र नयाँ वितरण गरिएका सदस्यहरूकै थप विवरण मागेर अहिले क्रियाशील अद्यावधिक गरिएको हो, नयाँ क्रियाशील थपेको छैन, नयाँ क्रियाशील आवेदन फारम भने हालै खुला भएको छ।
महामन्त्री प्रदीप पौडेलको संयोजकत्वमा क्रियाशील सदस्यता व्यवस्थापन समिति छ। यो समितिले वैशाख १ देखि जेठ २८ गतेभित्र क्रियाशील अद्यावधिक गर्ने गरी मातहत समितिहरूलाई समन्वय र सहजीकरण गरेको थियो।
क्रियाशील सदस्यता अद्यावधिक कार्य वडा सभापतिहरूले नै गरेका हुन्। त्यसका लागि केन्द्रीय कार्यालयले प्रणाली विकास गरी युजर नेम र पासवर्ड दिएको थियो।
अब कांग्रेसमा कति क्रियाशील सदस्य थिए त्यो चर्चा गरौं। २०७८ साल मंसिर २४ देखि २८ गतेसम्म १४ औं महाधिवेशन हुँदा कांग्रेसमा ८ लाख ८२ हजार ८ सय १६ जना क्रियाशील सदस्य कायम गरिएको थियो।
यीमध्ये गत पुससम्म नवीकरण र नयाँ वितरण गरी कूल ७ लाख ८१ हजार २ सय ३३ जना क्रियाशील सदस्य कायम रहेको कांग्रेसको विवरणमा देखिन्छ। विधानअनुसार हरेक वर्ष क्रियाशील नवीकरण गर्नुपर्ने भए पनि हरेक महाधिवेशनमा त्यो धारा निलम्बन गरी एकैपटक क्रियाशील सदस्यता लिन पाइने बनाइन्थ्यो। विगतमा महाधिवेशन मिति तोकिसकेपछि क्रियाशील लिने र नवीकरण गर्ने संख्या पनि केही थपिन्थ्यो।
तर यसपालि विशेष महाधिवेशनबाट आएको कांग्रेस नेतृत्वले विगतमा जस्तो धारा निलम्बन नगरी एकै पटक क्रियाशील अद्यावधिक गरे हुने र एनसी आइडी दिने व्यवस्था गर्यो।
क्रियाशील सदस्यहरूको मोबाइल नम्बर पनि नरहेको भन्दै मोबाइल नम्बर, सामाजिक सञ्जाल आइडी, उमेरलगायत थप विवरणसमेत माग गरेको थियो। त्यसका लागि जरा अभियानसँगै क्रियाशील अद्यावधिक अभियान चलेको थियो।
महामन्त्री तथा क्रियाशील सदस्यता व्यवस्थापन समिति संयोजक प्रदीप पौडेलका अनुसार गत पुसमा नियमित महाधिवेशन गर्ने भनेर कायम भएका कूल ७ लाख ८१ हजार २ सय ३३ जना मात्रै क्रियाशील अद्यावधिकका लागि योग्य हुन्, उनीहरूकै थप विवरण लिएर अद्यावधिक गरिएको हो।
‘यो संख्या १५ औं महाधिवेशनका लागि नवीकरण गरेको र नयाँ वितरण गरेको क्रियाशील सदस्यको संख्या थियो,’ उनले भने, ‘जसले पुससम्म नवीकरण र नयाँ सदस्यता लिएका थिए, उनीहरूकै थप विवरण लिन अद्यावधिक गर्नुपरेको हो।’
महामन्त्री पौडेलका अनुसार आज जेठ २६ गतेसम्म क्रियाशील अद्यावधिक गरी एनसी आइडी प्राप्त गर्नेको संख्या ४ लाख २३ हजार ३ सय १० जना छ।
क्रियाशील सदस्यता नवीकरण गर्न अनलाइनबाट आवेदन दिएको र सम्बन्धित वडा सभापतिले स्वीकृत नगरिदिएको संख्या १ लाख ३ हजार २ सय ५२ जना छ।
‘क्रियाशील सदस्यले नवीकरण गर्न चाहेर सिष्टममा आवेदन दिएको तर सम्बन्धित वडा सभापतिले स्वीकृति नदिएको पनि पाइएको छ, यस्तो दुई कारणले भएका छन्। सिष्टममा स्वीकृति कसरी गर्ने मेसो नपाएर र राजनीतिक कारणले कसैले अह्राएकोले रोकेको अवस्था पनि छ,’ उनले भने, ‘केही वडाध्यक्षले आफूले सिष्टम होल्ड गरेका छन्, स्वीकृत गरिदिँदैनन्, अरूलाई पनि सिष्टम चलाउन दिँदैनन्, यस्तो अवस्था पनि छ।’
महामन्त्री पौडेलका अनुसार आजसम्म ५ लाख २६ हजार ५ सय ६२ जनाले क्रियाशील सदस्यता अद्यावधिक गरिसकेका छन्। यीमध्ये केही हजार क्रियाशीलले एनसी आइडी पाउन भने बाँकी छ।
साथै अब करिब २ लाखले क्रियाशील सदस्यता अद्यावधिक गर्न बाँकी रहेको उनले बताए। ‘दुई लाखजतिले क्रियाशील अद्यावधिक गर्न बाँकी देखिन्छ, यीमध्ये केही इन्टरनेट पहुँच नभएकोलगायत समस्याले गर्दा पनि अद्यावधिक नभएको देखिन्छ। त्यसैले मनाङ, मुस्ताङसहित केही हिमाली र केही उच्च पहाडी गरी ७ जिल्लामा हार्ड कपीमै विवरण ल्याउन भनिएको छ,’ उनले भने, ‘यी जिल्लामा करिब ६० हजार क्रियाशील अद्यावधिक हुने हाम्रो आकलन छ।’
उनकाअनुसार करिब डेढ लाख हाराहारी क्रियाशील सदस्यले भने राजनीतिक कारणले अद्यावधिक गरेका छैनन्। ‘कतिपय नेताका अपिल सुनेर पनि क्रियाशील अद्यावधिक रोकेको देखिन्छ, केहीले क्रियाशील अद्यावधिक गर्न चाहेका छैनन्, केही अरू पार्टीमा गएका छन् त कतिपयको मृत्यु पनि भइसकेको छ,’ उनले भने।
वैशाख १ देखि अद्यावधिक सुरू गरे पनि वैशाखभर अद्यावधिक के हो भन्ने बुझाउनै समय लागेको महामन्त्री पौडेल बताउँछन्। ‘बाँकी ६ सातामा हामीले द्रुत गतिमा क्रियाशील अद्यावधिक गरियो, पार्टीका सबै सदस्यलाई डिजिटलाइज गरेर प्रविधिसँग जोड्ने कांग्रेस पहिलो पार्टी बन्दैछ,’ उनले दाबी गरे।
नेता पूर्णबहादुर खड्का र शेखर कोइरालाले क्रियाशील अद्यावधिक नगर्न अपिलसमेत गरेका थिए।
क्रियाशील अद्यावधिक गर्न अझै दुई दिन समय रहेकोले सबै सदस्यलाई अद्यावधिक गरी यो कार्यलाई पूर्णता दिन सहयोग गर्न पनि उनले आग्रह गरेका छन्। ‘दुई दिनभित्र क्रियाशील अद्यावधिक गरिदिनुहोला, अब समय थपिँदैन, महाधिवेशन प्रक्रिया अघि बढ्छ,’ उनले भने।
कांग्रेस सदस्यता व्यवस्थापन केन्द्रीय समितिको सोमबारको बैठकले पनि विद्यमान क्रियाशील सदस्यता अद्यावधिक सम्वन्धमा जेठ २८ गतेसम्मको समयसीमालाई नै अन्तिम म्याद कायम गरिएको उल्लेख गरेको छ।
कांग्रेसले असोजमा हुने १५ औं महाधिवेशनमा सहभागी हुन क्रियाशील सदस्यले प्राप्त गरेको एनसी आइडी नै प्रमुख आधार हुने बताएको छ।
त्यसैले क्रियाशील सदस्यहरूले अनिवार्य रुपमा क्रियाशील सदस्यता अद्यावधिक गर्नुपर्ने कांग्रेसको भनाइ छ।
क्रियाशील सदस्यता अद्यावधिक प्रक्रियामा कुनै प्राविधिक समस्या भएमा सहजीकरणका लागि पार्टीको आधिकारिक वेबसाइटमा उपलब्ध नम्बरमा फोन गर्न सकिने केन्द्रीय कार्यालयले जनाएको छ।
कांग्रेसको क्रियाशील सदस्यता रीतपूर्वक अद्यावधिक गर्न चाहने कुनै पनि योग्य सदस्यको सदस्यता अद्यावधिक प्रक्रियालाई अद्यावधिक गर्नबाट अवरुद्ध वा बञ्चित नगरिने कुराको पूर्ण रूपमा सुनिश्चितता गरिएको र विधान बमोजिम क्रियाशील सदस्यता अद्यावधिक गर्ने प्रक्रियामा कुनै तहबाट अवरोध भएमा केन्द्रीय कार्यालयमा सिधै सम्पर्क गरी अद्यावधिक गर्न सक्ने व्यवस्था मिलाइएको कांग्रेसको भनाइ छ।
पार्टीको अनुशासन समितिको कारबाहीमा परेका, नेपाली कांग्रेस परित्याग गरी अन्य राजनीतिक दलमा प्रवेश गरेका वा पार्टीको आधिकारिक उम्मेदवारविरुद्ध कुनै पनि पदमा बागी उम्मेदवारी दिएका निजका प्रस्तावक/समर्थक तथा अन्य पार्टीको उमेदवारको प्रस्तावक/समर्थक र प्रचारक भएका व्यक्तिहरूको सन्दर्भमा, प्राप्त प्रमाणका आधारमा निजको सदस्यता केन्द्रीय अभिलेखबाट हटाइने पार्टीले जनाएको छ।
आफ्नो क्रियाशील सदस्यता अन्य कसैले अनाधिकृतरुपमा अद्यावधिक गरेको जानकारी प्राप्त भएमा सो को प्रमाणसहित केन्द्रीय कार्यालयमा जानकारी दिन सक्ने व्यवस्था मिलाइएको पनि कांग्रेसले जनाएको छ। प्राप्त जानकारीका आधारमा छानबिन गरी त्यस्तो क्रियाशील सदस्यता अद्यावधिक बदर गर्ने तयारी छ।
कांग्रेस केन्द्रीय समितिका पदाधिकारी तथा सदस्यहरू, प्रदेश कार्यसमितिका पदाधिकारी तथा सदस्य, जिल्ला, क्षेत्र, प्रदेश सभा क्षेत्र, पालिका तथा वडा समितिका पदाधिकारी तथा सदस्य, भ्रातृ तथा शुभेच्छुक संस्थाका पदाधिकारी, कांग्रेसको क्रियाशील सदस्य रहेका संघीय संसदका सबै सदस्य, प्रदेशका मुख्यमन्त्री, मन्त्री तथा प्रदेश सभा सदस्य, स्थानीय तहका जनप्रतिनिधिले जेठ २७ गतेभित्र आफ्नो क्रियाशील सदस्यता अद्यावधिक गर्नुपर्ने पनि महामन्त्री पौडेलले जानकारी दिए।
कांग्रेसले योग्यता पुगेका कुनै पनि नेपाली नागरिकलाई नयाँ क्रियाशील सदस्यता उपलब्ध गराउने कार्यलाई निर्वाध रूपमा अघि बढाउन पार्टीका सबै तहलाई निर्देशन पनि दिएको छ।
नयाँ क्रियाशील सदस्यता वितरण गर्दा पार्टी विधानले तोकेको विधि र प्रक्रिया बमोजिम कांग्रेसको आधिकारिक वेबसाइटमार्फत रीतपूर्वक परेका अनलाइन फारम वडा तहबाट तहगत सिफारिस हुँदै प्रतिनिधि सभा क्षेत्रीय कार्यसमितिबाट क्रियाशील सदस्यता स्वीकृत हुने व्यवस्था छ।
