नेपाली कांग्रेसका सांसद चन्द्रमोहन यादवले सभामुख डोलप्रसाद अर्यालको रास्वपासँगको नाभी नकाटिएको टिप्पणी गरेका छन्।
प्रतिनिधि सभाको बैठकमा सांसद यादवले 'नेपालले पनि भारतको जग्गा मिचेको छ' भन्ने प्रधानमन्त्री बालेन्द्र (बालेन) शाहले दिएको अभिव्यक्ति रेकर्डबाट नहटाइएको विषयमा सभामुखमाथि प्रश्न उठाएका हुन्।
'मलाई स्वयम् सभामुखसँग प्रश्न छ। सभामुख महोदय गरिमामय कुर्सीमा बस्नु भन्दा पहिला एउटा पार्टीसँग सम्बन्धित हुनुहुन्थ्यो,' यादवले भने, 'अहिलेसम्म पहिलाको पार्टी रास्वपासँगको नाभी काट्न सक्नुभएको छैन कि क्या हो। सभामुखले सदनको गार्जियनका रूपमा सम्मान बढाउने हो।'
उनले सदनमाथि जनताको विश्वास भए पनि अहिले देशभरिका जनताका मनमा अनेकौं प्रश्न उभिएको बताए।
सभामुख अर्यालमाथि प्रश्न उठाएपछि रास्वपा सांसद गणेश कार्कीले नियमापत्ति गरेका थिए।
प्रतिनिधि सभा नियमावलीले सभामुखको आलोचना गर्न बर्जित गरेको छ।
'नियमावलीको नियम २१ को (ख) मा सभामुखले पद आचरण गरेको बेला बाहेक सभामुखको आचरणको आलोचना गर्न नपाइने भनेको छ। जतासुकै हिलो छ्यापेर विधि बस्दैन,' कार्कीले नियमापत्ति गर्दै भने, 'बोलेको कुरा रेकर्डबाट हटाइयोस्।'
लगत्तै सभामुख अर्यालले नाभी नकाटिएको शब्द र टिप्पणीबारे सांसद यादवलाई नियमावलीको व्यवस्थाबारे ध्यानाकर्षण गराएका थिए।
