पूर्वप्रधानमन्त्री तथा नेपाली कांग्रेसका निवर्तमान सभापति शेरबहादुर देउवा झन्डै ४ महिनादेखि विदेशमा छन्।
उनी प्रतिनिधि सभा चुनावको मुखमा विदेश गएका थिए।
देउवा पछिल्लो पटक फागुन १४ गते सिंगापुर उडेका थिए।
पूर्वप्रधानमन्त्री देउवाभन्दा केही दिनअघि नै भारत हुँदै उनकी पत्नीसमेत रहेकी पूर्वपरराष्ट्र मन्त्री आरजु राणा देउवा पनि सिंगापुर पुगेकी थिइन्।
उनीहरूले सिंगापुरको कुन अस्पतालमा केसम्बन्धी उपचार गराए भन्ने यकिन छैन। भदौ २४ गते निवास बूढानीलकण्ठमा आगजनी र देउवा दम्पतीमाथि कुटपिट भएको थियो। त्यसको लामो समयसम्म स्वदेशमै देउवा दम्पती उपचारमा थिए।
सिंगापुरमा केही समय रहेर देउवा दम्पती त्यहाँबाट हङकङ पुगेको सचिवालयले पत्रकारहरूलाई ह्वाट्सएपमा जानकारी दिएको थियो। उनीहरूको थप उपचार हङकङमा हुने सचिवालयको भनाइ रहे पनि कुन अस्पतालमा केसम्बन्धी उपचार गर्ने खुलाइएको थिएन।
गत चैत ६ गते सचिवालयले देउवा दम्पती थप उपचार र पारिवारिक कार्यक्रममा सहभागी हुन हङकङ पुगेको जानकारी उपलब्ध गराएको थियो। त्यसको साता/दश दिनमा उनीहरू स्वदेश फर्कने बताइए पनि अहिलेसम्म आएका छैनन्।
यसबीचमा देउवाको सचिवालयले उनीहरूको स्वास्थ्य उपचारलगायत विषयमा औपचारिक जानकारी दिएको छैन।
रास्वपा वरिष्ठ नेता बालेन शाह नेतृत्वमा नयाँ सरकार बनेपछि देउवा दम्पतीविरूद्ध पक्राउ पुर्जी जारी गर्दै रेड कर्नर नोटिस जारी गर्ने प्रक्रिया सुरू भएको थियो। तर पक्राउ पुर्जीको म्याद सकिइसकेको छ भने सर्वोच्च अदालतले पनि त्यो पक्राउ पुर्जीअनुसार देउवा दम्पतीलाई पक्राउ नगर्न भनेको छ।
यसबीच देउवा दम्पतीले सम्पत्ति शुद्धीकरण विभाग लगायतलाई इमेलमार्फत् पत्रसमेत पठाएको पाइएको छ।
उनीहरूले साउन २८ गतेसम्म स्वदेश फर्केर अनुसन्धानमा सघाउने पत्रमा उल्लेख गरेका छन्। अनुसन्धानमा सहयोग गर्ने प्रतिबद्धता जनाउँदै उनीहरूले नेपाल छाडेर भागेको जस्तो गरेर पक्राउ पुर्जी जारी नगर्न र सहज रूपमा नेपाल फर्किने वातावरण बनाउन माग पनि गरेका थिए।
यसबारे हामीले देउवाका भतिजासमेत रहेका स्वकीय सचिव भानु देउवासँग बुझ्दा उनले देउवा दम्पतीले हालै इमेलमार्फत् सम्पत्ति शुद्धीकरण विभागमा सो कुरा समावेश गरिएको पत्र पठाएको जानकारी दिए।
भदौ २४ मा देउवा निवासमा पैसा जलेको अवस्थामा भेटिएको भन्दै भिडिओहरू सामाजिक सञ्जालमा आएको थियो। त्यसपछि सम्पत्ति शुद्धीकरण विभागको टोलीले बूढानीलकण्ठस्थित निवास पुगेर जलेका पैसाको नमूना संकलन गरेको थियो। सोसहित विभिन्न आधार देखाउँदै देउवा दम्पतीमाथि नै सम्पत्ति शुद्धीकरण विभागले अनुसन्धान अघि बढाएको थियो।
‘अनुसन्धानमा सहयोग पुर्याउँछौं भनेर उहाँहरूले सम्पत्ति शुद्धीकरण विभागलाई इमेलमार्फत् पत्र पठाउनुभएको हो,’ स्वकीय सचिव भानुले भने।
यसबीच अख्तियार दुरूपयोग अनुसन्धान आयोगले इ-पासपोर्ट खरिद प्रक्रियामा पूर्वपरराष्ट्र मन्त्री आरजु राणा देउवालाई अनुसन्धानको दायरामा ल्याएको छ।
अख्तियारको अनुसन्धान टोली मंगलबार बूढानीलकण्ठस्थित निवासमा पुगेर बयानका लागि हाजिर हुन आउनु भनी म्याद तामेलसमेत गरिसकेका छन्।
अख्तियारको टोलीले आफूलाई सम्पर्क गरेर इ-पासपोर्ट लागि म्याद तामेल गरेको बूढानीलकण्ठ नगरपालिका-२ का वडाध्यक्ष राजेन्द्र श्रेष्ठले सेतोपाटीलाई जानकारी दिए।
'अख्तियार टोलीले आरजु राणा देउवामाथि अनुसन्धानका लागि म्याद तामेल गर्नु परेकाले सम्पर्क गरेको थियो। मैले भानु देउवासँग सम्पर्क गराइदिएको हो,' उनले भने।
बाटोको म्यादबाहेक ३ दिनभित्र बयान दिन आउन पूर्वपरराष्ट्र मन्त्री आरजुलाई समय दिइएको अख्तियारले जनाएको छ। उक्त म्याद भित्र नआएमा कानुनबमोजिम अघि बढ्ने चेतावनीसमेत अख्तियारले दिएको छ।
हामीले यसबारे पनि भानु देउवासँग पनि बुझेका छौं।
उनले पूर्वपरराष्ट्र मन्त्री आरजु राणाबारे म्याद तामेलीका सन्दर्भमा आफूलाई केही जानकारी नभएको प्रतिक्रिया दिएका छन्। ‘यसबारे मलाई केही जानकारी छैन,’ उनले भने।
साथै उनले देउवा दम्पती कहिले स्वदेश फर्कने भन्ने निश्चित नभएको पनि बताए। ‘उहाँहरू कहिले स्वदेश फर्कने भन्ने निश्चित भइसकेको छैन,’ उनले सेतोपाटीसँग भने।
-ink-1760431025.jpeg)
