राष्ट्रिय स्वतन्त्र पार्टी (रास्वपा) को महामन्त्री पदमा पराजित भएका गणेश कार्कीले हारजितलाई प्राविधिक विषय भएको भन्दै पार्टीभित्रको लोकतान्त्रिक निर्वाचन नै मुख्य विषय भएको बताएका छन्।
महामन्त्री पदको निर्वाचन परिणाम सार्वजनिक भएपछि सामाजिक सञ्जालमार्फत प्रतिक्रिया दिँदै कार्कीले पार्टीभित्र सम्पन्न भएको लोकतान्त्रिक अभ्यासले संगठनलाई अझ बलियो बनाउने विश्वास व्यक्त गरेका हुन्।
उनले लेखेका छन्, 'हारजित प्राविधिक विषय हो, पार्टीभित्रको लोकतान्त्रिक निर्वाचन मुख्य विषय हो। यो निर्वाचनले पार्टीको लोकतान्त्रिक बाटोलाई अझ फराकिलो पार्नेछ भन्ने आशा गरौं।'
कार्कीले निर्वाचनबाट महामन्त्रीमा निर्वाचित विपिन आचार्यलाई बधाई दिँदै सफल कार्यकालको शुभकामना पनि व्यक्त गरेका छन्।
उनले भने, 'महामन्त्रीमा निर्वाचित भएकोमा साथी विपिन आचार्यलाई मनैदेखि बधाई छ। सफल कार्यकालको शुभकामना छ।'
रास्वपाको आन्तरिक निर्वाचनमा महामन्त्री पदका लागि भएको प्रतिस्पर्धामा विपिन आचार्य विजयी भएका हुन्।
