राष्ट्रिय स्वतन्त्र पार्टी (रास्वपा) सभापति रवि लामिछानेले संविधानको समीक्षा गर्दा पिँधमा रहेका नागरिकलाई केन्द्रमा राख्नुपर्ने बताएका छन्।
संविधान दिवसका अवसरमा शुभकामना सन्देश जारी गर्दै लामिछानेले नेपालको संविधानले आर्थिक समृद्धि, सामाजिक न्याय र सुशासनको बलियो आधार निर्माण गर्ने अभिभारा पूरा गर्न अझै बाँकी रहेको बताएका हुन्।
उनले संविधान अक्षरहरूको सँगालो मात्र नभई राज्य र नागरिकबीचको करार भएको उल्लेख गर्दै लोकतन्त्रको स्थायित्व र संविधानको सार्थकता त्यसले परिकल्पना गरेका मौलिक हक सीमान्तकृत नागरिकको दैनिक जीवनको यथार्थ बनेपछि मात्र हुने बताए।
लामिछानेले रास्वपाले सामाजिक लोकतन्त्रमार्फत नागरिकको मुहारमा खुसी र समाजमा न्याय स्थापित गर्ने अठोट गरेको बताएका छन्।
उनले संविधानलाई जीवन्त दस्तावेजका रूपमा व्याख्या गर्दै राजनीतिक अभ्यासबाट प्राप्त अनुभवका आधारमा यसको अन्तर्वस्तु परिष्कृत र संशोधन हुन सक्ने बताए।
संविधानमै रहेको व्यवस्थाले पनि संविधानको समीक्षा आवश्यक रहेको उनको भनाइ छ।
‘तर, अबको समीक्षा पिँधमा रहेका मान्छेलाई केन्द्रमा राखेर हुनुपर्छ,’ लामिछानेले भनेका छन्।
उनले बेथिति र कमजोरी सच्याउँदै लोकतन्त्र र समावेशितालाई थप बलियो बनाउने गरी विवेकपूर्ण बहस गर्ने उपयुक्त दिन संविधान दिवस भएको बताए।
लामिछानेले बलियो राज्यका लागि बलिया संस्था आवश्यक रहेको उल्लेख गर्दै संविधान दिवसले राजनीतिक शक्ति, राज्यका अंग र आम नागरिकलाई आ–आफ्नो स्वार्थभन्दा माथि उठेर बलियो नेपाल निर्माणको साझा एजेन्डामा एकताबद्ध हुन प्रेरणा दिने विश्वास व्यक्त गरेका छन्।
-1746009348.jpg)
