राष्ट्रिय स्वतन्त्र पार्टी (रास्वपा) ले भोटेकोशी बाढीबाट भएको क्षति र त्यससँग जोडिएका बहुआयामिक विषयलाई संयुक्त राष्ट्रसंघको महासभामा उठाउन निर्देशन दिएको छ।
महासभामा प्रधानमन्त्री बालेन शाह र परराष्ट्रमन्त्री शिशिर खनाल लगायत सहभागी हुनेछन्।
आइतबार बसेको रास्वपा केन्द्रीय सचिवालय बैठकले महासभामा सहभागी हुन जाने प्रधानमन्त्री, परराष्ट्रमन्त्री लगायतको टोलीलाई भोटेकोशी विपदसँग जोडिएका विषय उठाउने तयारी गर्न निर्देशन दिएको हो।
'संयुक्त राष्ट्रसंघको महासभामा सहभागी हुन जान लाग्नुभएका प्रधानमन्त्री, परराष्ट्र मन्त्री लगायतको कार्यदललाई नेपालको भोटेकोशी विपदसँग जोडिएका बहुआयामिक पक्ष, बदलिँदो राजनीतिक परिस्थिति, समृद्धि, अन्तर्राष्ट्रिय सम्बन्ध र विश्वमञ्चमा नेपालको भूमिकाका विषयमा सम्बोधनकेन्द्रित गर्ने गरी तयारी गर्न नीतिगत निर्देशन दिइएको छ,' प्रवक्ता जगदीश खरेलले जारी गरेको विज्ञप्तिमा उल्लेख छ।
बाढीमा परी ज्यान गुमाएका तर शव पहिचान हुन नसकेकाहरूको शीघ्र डिएनए परीक्षण गर्न तथा बेपत्ता भई आशा मारिएका व्यक्तिका परिवारको सहमतिमा मृत्यु प्रमाणपत्र उपलब्ध गराउने कानुनी प्रक्रिया छिटो टुंगोमा पुर्याउन पनि रास्वपाले सरकारको ध्यानाकर्षण गराएको छ। 'पीडित परिवारलाई राहत तथा सुविधा उपलब्ध गराउनु,' रास्वपाले सरकारलाई ध्यानाकर्षण गरेको छ।
बैठकमा उपसभापति तथा अर्थमन्त्री स्वर्णिम वाग्लेले हालै सम्पन्न भारत भ्रमणका क्रममा भएका भेटवार्ता तथा आर्थिक कूटनीतिका विषयमा सचिवालयलाई जानकारी गराएका थिए।
बैठकले भोटेकोशी विपद्का कारण स्थगित गरिएका पार्टीका सम्पूर्ण आधिकारिक गतिविधि पुनः सञ्चालन गर्ने निर्णय पनि गरेको छ।
यसअन्तर्गत ‘हामी सुन्छौँ’ अभियान, ‘नागरिक नीति र नेतृत्व’ अभियान तथा स्थानीय तहका उम्मेदवार छनोट प्रक्रियालगायत सांगठनिक र जनसम्पर्कका कार्यक्रम तत्काल अघि बढाइने रास्वपाले जनाएको छ।
त्यस्तै, बैठकले पार्टीको मधेश प्रदेशको सांगठनिक अवस्था तथा कार्यसम्पादन अडिटबारे पनि छलफल गरेको छ।
पार्टीका सहमहामन्त्री तथा मधेस प्रदेश संयोजक हरि ढकालले प्रारम्भिक प्रतिवेदन प्रस्तुत गरेका थिए। विस्तृत प्रतिवेदन प्राप्त भएपछि आवश्यक थप रणनीतिक कदम अघि बढाउने निर्णय भएको छ।
बैठकले पार्टीको केन्द्रीय अनुशासन आयोगलाई पूर्णता दिँदै १० जनालाई सदस्यमा नियुक्त गरेको छ।
नियुक्त हुनेमा अधिवक्ता हरिचन्द्र भट्टराई, अधिवक्ता सुशीला सिंखडा, रामचन्द्र कार्की, अधिवक्ता शान्ता थापा, अधिवक्ता नन्दन तिमिल्सिना, अधिवक्ता रोहन बोहजू, अधिवक्ता भविन्द्र राई, अधिवक्ता सन्तोष आचार्य, अधिवक्ता सन्तोष बिसुङ्खे र अधिवक्ता श्वेता कुमारी छन्।
त्यसैगरी ज्ञानेन्द्र मल्ललाई युवा खेलकुद तथा सशक्तीकरण विभागको उपप्रमुखमा मनोनयन गरिएको छ।
अन्तर्राष्ट्रिय सम्बन्ध तथा कूटनीतिक विभागको सदस्यमा महेश भट्ट, टासी लाजोम र हिक्मतजंग कार्की तथा सार्वजनिक सेवा तथा जनगुनासो व्यवस्थापन विभागको सदस्यमा जयराम गुरूङ र राजकुमार श्रेष्ठलाई नियुक्त गरिएको छ।
बैठकमा नवमनोनित सचिवालय सदस्य तथा ऊर्जामन्त्री विराजभक्त श्रेष्ठ र सहप्रवक्ता सुरेन्द्र चौधरीले पार्टी सभापति रवि लामिछानेसँग पद तथा गोपनीयताको शपथ लिएका थिए।
-1746009348.jpg)
