नेकपा सांसद रमेशकुमार मल्लले सल्यानमा स्क्रब टाइफस संक्रमण बढ्दै गएको भन्दै सरकारको ध्यानाकर्षण गराएका छन्।
मंगलबार प्रतिनिधि सभाको आकस्मिक समयमा बोल्दै सांसद मल्लले सल्यानको दार्मा गाउँपालिकामा पछिल्लो एक महिनामै स्क्रब टाइफस संक्रमणका कारण अस्पतालमा उपचाररत ७ जनाको मृत्यु भएको बताएका हुन्।
उनकाअनुसार संक्रमण फैलिँदै गए पनि रोग पहिचानका लागि आवश्यक परीक्षण किट पर्याप्त छैन। स्थानीय तहले प्रदेश र संघीय सरकारसँग परीक्षण किट तथा आवश्यक स्वास्थ्य सहयोग माग गरेको एक महिना बितिसक्दा पनि सहयोग पाउन नसकेको उनले बताए।
हाल सल्यानका दार्मा, कुमाख, बागचौरलगायतका पालिकामा स्क्रब टाइफस संक्रमितको संख्या बढिरहेको मल्लले बताए। पछिल्लो दुई महिनामा दार्मा र बागचौरमा मात्रै ३३५ जनाको स्वास्थ्य परीक्षण गर्दा ११६ जनामा स्क्रब टाइफस संक्रमण पुष्टि भएको उनले जानकारी दिए। यो परीक्षण गरिएकामध्ये झण्डै ३५ प्रतिशत हो।
उनले अहिलेसम्मको तथ्यांक परीक्षण गरिएका व्यक्तिमा मात्र आधारित रहेको भन्दै सल्यानका सबै जोखिमयुक्त क्षेत्रमा पर्याप्त परीक्षण गर्ने हो भने संक्रमितको संख्या अझै धेरै हुन सक्ने बताए। परीक्षण किटको अभावमा रोगको समयमै पहिचान, उपचार तथा संक्रमणको वास्तविक अवस्था पत्ता लगाउन कठिन भइरहेको उनको भनाइ छ।
स्वास्थ्य मन्त्रालयको वार्षिक प्रतिवेदनअनुसार नेपालमा स्क्रब टाइफस संक्रमितको संख्या आर्थिक वर्ष २०७९/८० मा ९ हजार २४३ रहेकोमा आर्थिक वर्ष २०८१/८२ मा बढेर २५ हजार ४९४ पुगेको छ। त्यसमा पनि सबैभन्दा धेरै संक्रमण कर्णाली र सुदूरपश्चिम प्रदेशमा देखिएको मल्लले बताए।
स्वास्थ्य सेवा नागरिकको मौलिक हक भएको उल्लेख गर्दै उनले स्वास्थ्य संकटका बेला नागरिकले राज्यको उपस्थिति अनुभूति गर्न पाउनुपर्ने बताए।
उनले सल्यानमा पर्याप्त परीक्षण किट, आवश्यक औषधि र स्वास्थ्य सामग्री तत्काल उपलब्ध गराउन सरकारसँग माग गरेका छन्। साथै स्वास्थ्यकर्मीलाई अभिमुखीकरण दिन, जोखिमयुक्त समुदायमा घरदैलो स्वास्थ्य परीक्षण तथा जनचेतना अभियान सञ्चालन गर्न र संघ, प्रदेश तथा स्थानीय तहबीच प्रभावकारी समन्वय गरी संक्रमण नियन्त्रणका लागि तत्काल आवश्यक कदम चाल्न आग्रह गरेका छन्।
-1746009348.jpg)
