नेपाल कम्युनिष्ट पार्टी (एमाले) का केन्द्रीय सदस्य झपट रावलले पार्टीभित्र आन्तरिक लोकतन्त्र कमजोर बन्दै गएको भन्दै तीव्र असन्तुष्टि व्यक्त गरेका छन्।
जारी एमाले केन्द्रीय कमिटी बैठकमा बोल्दै नेता रावलले आन्तरिक लोकतन्त्र नै कमजोर भएको पार्टी पंक्तिले देश, संविधान र लोकतन्त्रका लागि प्रभावकारी लडाइँ लड्न नसक्ने ठोकुवा गरे।
वर्तमान परिस्थितिमा संसद पुनर्स्थापनाको मुद्दा उठाउनु पूर्णतः बेठिक रहेको उल्लेख गर्दै उनले पार्टीभित्र गठन गरिएको कार्यदलको प्रतिवेदन तत्काल केन्द्रीय सदस्यहरूलाई बाँडेर प्राप्त सुझावहरूलाई कडाइका साथ लागू गर्न माग गरे।
सरकार बनाउने र टिकाउने नाममा कमल थापादेखि एकनारायण ढकालसम्मलाई प्रयोग गरिएका कारण नै जनतामा पार्टीप्रति तीव्र वितृष्णा पैदा भएको टिप्पणी गर्दै उनले अहिल्यै नसच्चिए पार्टीका लागि योभन्दा अझै नराम्रो र दुर्दिन आउन धेरै समय नलाग्ने चेतावनी दिए।
नेता रावलले सामूहिक र संस्थागत प्रणाली अपनाउँदा मात्रै वास्तविक पार्टी एकता सम्भव हुने कुरामा जोड दिए।
साथै, महाधिवेशनका बेला बनेको गुटगत र व्यक्तिगत मनोविज्ञानले नै चुनावमा टिकट वितरण गर्दा मुख्य भूमिका खेलेको भन्दै उनले शीर्ष नेतृत्वलाई गम्भीर आत्मसमीक्षा गर्दै संस्थागत निर्णय प्रक्रियामा फर्किन आग्रह गरेका छन्।
-1790072299.jpg)
-1746009348.jpg)
