नेपाली कांग्रेसले १८ वर्ष उमेर पूरा नभएका व्यक्तिको पार्टी सदस्यता र प्रतिनिधित्व कायम हुन नसक्ने स्पष्ट गरेको छ।
कांग्रेसको विधान, २०१७ (एघारौँ संशोधनसहित) को धारा ४ को उपधारा १ (क) (१) मा पार्टी सदस्य बन्न १८ वर्ष उमेर पूरा भएको हुनुपर्ने व्यवस्था छ।
यसैअनुसार १५ औँ महाधिवेशनअन्तर्गत इलामको माइजोगमाई गाउँपालिका–५ को वडा अधिवेशनबाट क्षेत्रीय प्रतिनिधि निर्वाचित भएका सुजल चापागाईंको प्रतिनिधिको जिम्मेवारी स्थगन गरिएको कांग्रेसले जनाएको छ।
चापागाईं १७ वर्ष पूरा भएको र १८ वर्ष पुग्न केही महिना बाँकी रहेको नागरिकता विवरणबाट देखिएको कांग्रेसले जनाएको छ।
कांग्रेसका अनुसार चापागाईंले आगामी २०८३ माघ १८ गते १८ वर्ष उमेर पूरा गरेपछि मात्रै चाहेमा पार्टी सदस्यता कायम गर्न सक्नेछन्।
वडा तहका अधिवेशनमा अन्य जिल्लामा पनि १८ वर्ष नपुगेका व्यक्ति निर्वाचित भएको पाइएमा उनीहरूको हकमा पनि यही प्रक्रिया लागू हुने कांग्रेसले जनाएको छ।
कांग्रेस केन्द्रीय निर्वाचन समितिका सदस्य सचिव राजु कटुवालले विज्ञप्ति जारी गर्दै सम्बन्धित सबैलाई यसबारे जानकारीसमेत गराएका छन्।
-1790072299.jpg)
-1746009348.jpg)
