नेपाली कांग्रेसका प्रवक्ता देवराज चालिसेले प्रधानमन्त्री बालेन शाहलाई अन्तर्राष्ट्रिय मञ्चमा नेपालले उठाउनुपर्ने विषयबारे पार्टीले दिएको सुझाव सम्बोधनमा समेटिएको बताएका छन्।
कांग्रेसले प्रधानमन्त्रीलाई भेटेर अन्तर्राष्ट्रिय समुदायसमक्ष नेपालले उठाउनुपर्ने विषयबारे सुझाव दिएको र तीमध्ये केही विषय प्रधानमन्त्रीको सम्बोधनमा परेको उनको भनाइ छ।
प्रधानमन्त्रीले अन्तर्राष्ट्रिय मञ्चमा गर्ने सम्बोधनले समग्र देशको प्रतिनिधित्व गर्ने पनि उनले बताए। उनले कांग्रेसका सुझाव प्रधानमन्त्रीको सम्बोधनमा समेटिनुलाई सकारात्मक रूपमा लिएको बताए।
तर, एउटै विपद्सँग सम्बन्धित तथ्यांक फरक–फरक रूपमा प्रस्तुत भएको भन्दै चालिसेले स्पष्टता आवश्यक रहेको बताए।
उनका अनुसार परराष्ट्र मन्त्रीको सम्बोधनमा विपदबाट भएको क्षति नेपालको कुल गार्हस्थ्य उत्पादन (जीडीपी) को करिब १५ प्रतिशत रहेको उल्लेख गरिएको छ।
प्रधानमन्त्रीको सम्बोधनमा भने पुनर्स्थापना र पुनर्निर्माणका लागि आवश्यक रकम जीडीपीको करिब १० प्रतिशत रहेको उल्लेख गरिएको छ।
चालिसेले यी दुई फरक सूचकका आधारमा आएको अनुमान हुन सक्ने भए पनि तथ्यांकको आधार, परिभाषा र स्रोत स्पष्ट हुनुपर्ने बताए।
अन्तर्राष्ट्रिय समुदायसमक्ष देशका प्रमुख प्रतिनिधिले प्रस्तुत गर्ने राष्ट्रिय तथ्यांकमा अस्पष्टता देखिनु राम्रो सन्देश नभएको उनको भनाइ छ।
प्रधानमन्त्रीले आज बिहान संयुक्त राष्ट्र संघको महासभालाई सम्बोधन गरेका थिए।
-1788334994.jpg)
.JPG)
