अमेरिकी र इसराइली आक्रमणबाट सैन्य क्षमता ध्वस्त भएको दाबी गरिए पनि इरानसँग अझै १ हजार ५०० देखि २ हजार ५०० वटासम्म मिसाइल रहेको अमेरिकी गुप्तचर निकायको आकलन छ।
यसले युद्ध फेरि सुरु भए अमेरिका र उसका सहयोगीमाथि आक्रमण गर्न सक्ने क्षमता इरानसँग बाँकी रहेको देखाएको भनेर अमेरिकी अखबार वाल स्ट्रिट जर्नलले लेखेको छ।
यद्यपि इरानले मिसाइलको विवरण गोप्य राख्ने र भूमिगत भण्डारण तथा उत्पादन क्षमताको यकिन गर्न कठिन हुने भएकाले वास्तविक संख्या पत्ता लगाउन अझै मुस्किल छ।
तर इरानसँग अझै ठूलो मिसाइल भण्डार रहेकोमा अमेरिका विश्वस्त रहेको जर्नलले लेखेको छ।
अमेरिका र इसराइलले मिसाइल उत्पादन केन्द्रमा आक्रमण गरे पनि इरानले भण्डारण गरिएका पार्टपुर्जा प्रयोग गरेर उत्पादन जारी राखेको बताइएको छ।
युद्धअघिको तुलनामा उत्पादनको गति घटे पनि उसले आफ्नो सैन्य क्षमता पुनः निर्माण गरिरहेको अमेरिकी अधिकारीहरूले बताएका छन्। इरानसँग ठूलो संख्यामा ड्रोन र छोटो दूरीका मिसाइल पनि छन्।
जर्नलका अनुसार इसराइली सैन्य अधिकारीहरूले पनि इरानसँग लामो दूरीसम्म प्रहार गर्न सक्ने १५०० भन्दा बढी ब्यालिस्टिक मिसाइल रहेको आकलन गरेका छन्।
ट्रम्पको पहिलो कार्यकालमा अमेरिकी रक्षा मन्त्रालयमा मध्यपूर्व मामिला हेरेकी सिमोन लिडिनका अनुसार न्यूनतम अनुमान सही भए पनि इरानले युद्धअघिको मिसाइल भण्डारको आधाभन्दा बढी पुनः तयार पारिसकेको छ।
इरानको मिसाइल भण्डार पुनः बढिरहेको तथ्यले राष्ट्रपति डोनाल्ड ट्रम्प प्रशासनको दाबीमाथि प्रश्न उठाएको छ।
ट्रम्पसहित अमेरिकी अधिकारीहरूले इरानको सैन्य शक्ति ध्वस्त भएको बताउँदै आएका छन्। तर यही अवस्थाले इसराइलसँग मिलेर फेरि आक्रमण गर्ने कि नगर्ने भन्ने अमेरिकी प्रशासनभित्रको छलफललाई प्रभावित पारेको छ।
इरानले मिसाइल र ड्रोन प्रयोग गरेर मध्यपूर्वमा रहेका अमेरिकी सैन्य अखडा, रडार र आक्रमणको पूर्वसूचना दिने प्रणालीमा क्षति पुर्याएको छ। त्यसपछि अमेरिकाले आफ्ना केही सैन्य उपकरण र संरचना तुलनात्मक रूपमा सुरक्षित मानिएको इसराइलमा सारेको अमेरिकी र इसराइली अधिकारीहरूले बताएका छन्।
अहिले ट्रम्पले इरानमाथि थप ठूलो सैन्य आक्रमण गर्नुको सट्टा नाकाबन्दी र आर्थिक प्रतिबन्धमार्फत दबाब कायम राखेका छन्।
खाडी क्षेत्रका अमेरिकी सहयोगी देशहरूले पनि फेरि युद्ध सुरु भए इरानले आफूहरूमाथि मिसाइल र ड्रोनबाट जवाफी आक्रमण गर्न सक्ने भन्दै युद्धमा नफर्किन आग्रह गरेका छन्।
तर इसराइली प्रधानमन्त्री बेन्जामिन नेतान्याहु भने इरानमाथि फेरि सैन्य कारबाही गर्नुपर्ने पक्षमा छन्। त्यसमा उनको राजनीतिक स्वार्थ पनि छ।
इसराइली गुप्तचर निकाय मोसादका प्रमुख रोमन गोफम्यानले शुक्रबार वासिङ्टन पुगेर अमेरिकी अधिकारीसँग इरानबारे छलफल गरेका थिए।
ट्रम्पले बुधबार सैनिक दिवसको भाषणमा इरानमाथि पूर्ण विजय हासिल गर्न बाँकी रहेको संकेत गरेका थिए।
‘हामीले जित्यौँ। अब प्रश्न युद्ध कहिले अन्त्य गर्ने भन्ने हो। हामीले ९३ प्रतिशत होइन, पूर्ण विजय हासिल गर्नुपर्छ,’ उनले भनेका थिए।
इरानको वर्तमान शासन आफ्नो कार्यकालको अन्त्यसम्म कायम रहे अमेरिकाका लागि त्यो पराजय हुने पनि उनले बताएका थिए।
तर अमेरिकी रक्षामन्त्री पिट हेगसेथले मंगलबार इरानको रक्षा उद्योग ध्वस्त भएको दाबी गरेका थिए।
इरानको आणविक उद्योगसँग सम्बन्धित ८० प्रतिशतभन्दा बढी संरचना पनि नष्ट भएको उनको भनाइ थियो। ‘हरेक हिसाबले हामीले ऐतिहासिक सैन्य विजय हासिल गरेका छौँ,’ उनले भनेका थिए।
यद्यपि, इरानले भूमिगत भण्डारणस्थलमा रहेका मिसाइल पुनः निकाल्न थालेको अमेरिकी अधिकारीहरूको भनाइ छ।
यसअघि वाल स्ट्रिट जर्नलले नै इरानसँग भूमिगत स्थानमा हजारौं छोटो र मध्यम दूरीका मिसाइल रहेको र अमेरिकी तथा इसराइली आक्रमणले पुरिएका प्रवेशद्वार इरानले खनेर खुलाउन थालेको समाचार प्रकाशित गरेको थियो।
सेप्टेम्बरमा उसले भण्डारण गरिएका पार्टपुर्जा प्रयोग गरेर इरानले मिसाइल उत्पादन पुनः सुरु गरेको पनि जनाएको थियो।
वासिङ्टनस्थित भूराजनीतिक जोखिमसम्बन्धी संस्था ट्रेन्ड्स यूएसका बिलाल साबका अनुसार इरानको चुनौती मिसाइलको संख्यामा मात्रै सीमित छैन।
उसले निशाना पहिचान गर्ने क्षमता र आक्रमणको रणनीति पनि सुधार गरेको छ।
मिसाइल र ड्रोन एकैपटक प्रयोग गर्ने तथा रुसजस्ता सहयोगीबाट प्राप्त सूचनाको उपयोग गर्ने क्षमताले उसका आक्रमण प्रभावकारी बनेका छन्।
‘मिसाइल भण्डारको आकार मात्रै महत्त्वपूर्ण होइन, इरानले त्यसलाई कसरी प्रयोग गर्छ भन्ने पनि हो। उसका सैन्य कमान्डरले आक्रमणलाई प्रभावकारी बनाउने नयाँ तरिका सिकेका छन्,’ साबले भनेका छन्।
