नेपाली कांग्रेसका सभापति गगन थापाले पुस पहिलो साता जिल्ला अधिवेशन गर्ने गरी तयारी गरिएको बताएका छन्।
अब बस्ने केन्द्रीय समिति बैठकमा यसबारे छलफल हुने र केन्द्रीय निर्वाचन समितिमार्फत् अधिवेशन मिति तय गरिने उनले बताए।
‘पुसको पहिलो साता जिल्ला अधिवेशन गर्छौं, त्यसपछि तीन-चार दिनमा प्रदेश अधिवेशन गरिन्छ,’ आइतबार छठ मनाउन सर्लाही ४ मा पुगेका सभापति थापाले भने, ‘यी दुई अधिवेशन सकेपछि हामी स्थानीय तह निर्वाचन तयारीमा जुट्छौं।’
कांग्रेसले जिल्ला र प्रदेश अधिवेशन नगरी १५ औं केन्द्रीय महाधिवेशन गरेको थियो।
सभापति थापाका अनुसार निर्वाचन आयोगले स्थानीय तह निर्वाचन मितिबारे छलफल गर्न दलका प्रतिनिधिहरूलाई बोलाएको छ। उक्त छलफल मंसिर ४ गते हुनेछ।
‘निर्वाचन आयोगले मुख्य राजनीतिक दलहरूलाई छलफलमा बोलाएको छ त्यो दिनको छलफलपछि स्थानीय तह निर्वाचन कहिले हुने तिथिमिति तय होला,’ उनले भने।
केन्द्रीय सरकार ढंगले नचलेको पनि उनले बताए।
