काभ्रेको रोशी गाउँपालिका–३ साँझाकोटमा निसान गाडी दुर्घटनामा परी मृत्यु भएका व्यक्तिको परिवारलाई पाँच लाख क्षतिपूर्ति दिने सहमति भएको छ।
यहीँ असोज २४ गते महाभारत गाउँपालिका–२ थामबाट दशैँ मनाएर बनेपातर्फ आउँदै गर्दा साँझाकोटमा दुर्घटनामा परी दुई जनाको मृत्यु भएको थियो।
जिल्ला प्रहरी कार्यालयका प्रहरी प्रमुख तथा प्रहरी उपरीक्षक जयराज सापकोटाका अनुसार मृतक दुई जनाको परिवारलाई क्षतिपूर्तिबापत पाँच/पाँच लाख रुपैयाँ उपलब्ध गराउने, किरिया खर्चबापत पचास/पचास हजार दिने र घाइतेको उपचार गरिदिने गाडी धनी सुनिल थापा तथा मृतकका आफन्तबीच आइतबार सहमति भएको छ।
मृतकका परिवारलाई पाँच लाख रुपैयाँ दिने सहमति भएपछि परीक्षणपश्चात् आफन्तले शव जिम्मा लिएका छन्। किरिया खर्चबापतको पचास/पचास हजार रकम आज नै उपलब्ध गराइसकेको र क्षतिपूर्ति रकम १५ दिन भित्रमा दिने सहमति भएको प्रहरीले जनाएको छ।
सो घटनामा परी सोही गाउँपालिकाको वडा नं २ अमलवासका वकिल बोम्जन र सोही ठाउँ घर भई हाल ललितपुर जिल्ला गोदावरी नगरपालिका बस्ने प्रकाश मोक्तानको मृत्यु भएको थियो।
उक्त घटनामा परी ३२ जना घाइते भएका र उनीहरुमध्ये केहीको उपचार भइरहेको तथा केही उपचारपश्चात् घर फर्किसकेको गाउँपालिकाका अध्यक्ष कान्छालाल जिम्बाले जानकारी दिए। रासस
