पक्राउ परेका २५ ‘हाइप्रोफाइल’ जुवाडेमध्ये १६ जना धरौटीमा छुटेका छन्।
सम्पत्ति शुद्धीकरण अनुसन्धान विभागले हेलिकप्टर कम्पनी एयर डाइनेस्टीका प्रबन्ध निर्देशक पवित्रकुमार कार्कीसहित १६ जनालाई छुट्टाछुट्टै सोमबार र मंगलबार धरौटीमा छोडेको हो।
विभागले पवित्रकुमार कार्की, पवनकुमार गुप्ता, इन्द्रबहादुर श्रेष्ठ, श्रवणकुमार गोयल, गेल्जे लामा, सोहेल कार्की, बुद्ध लामा र रामकृष्ण केसीलाई जनही २० लाख धरौटी मागेको थियो।
यस्तै, अशोक श्रेष्ठ र कृष्णहरि भण्डारीसँग विभागले जनही १९ लाख ४० हजार रुपैयाँ धरौटी लिएको छ भने धावा लामासँग १६ लाख ५० हजार, श्यामप्रसाद पराजुली र साङ्बु शेर्पासँग ९ लाख ४० हजार धरौटी मागेको छ।
यसैगरी, रञ्जन राजवंशीसँग ८ लाख ९५ हजार, होमप्रसाद चौलागाईंसँग ६ लाख र प्रेम थापा मगरसँग २ लाख ५० हजार रुपैयाँ धरौटी मागिएको विभागले जनाएको छ।
सम्पत्ति शुद्धीकरण ऐनको दफा ३० र ३१ बमोजिम तत्काल धरौटीमा रिहा गरेर अनुसन्धानलाई जारी राखिएको विभागका महानिर्देशक रुपनारायण भट्टराईले बताए।
‘क्यासिनो किङ’ भनेर चिनिने डन बलराम सापकोटा ‘बले’सहित केहीलाई भने अनुसन्धानका लागि हिरासतमै राखेको छ।
बलेसहित नौ जनामाथि थप अनुसन्धान जारी रहेको भट्टराईले बताए। महाराजगञ्जस्थित विक्रम गौतमको घरबाट २ करोड ६७ लाखसहित २५ जना जुवाडे कात्तिक ९ गते पक्राउ परेका थिए।
महानगरीय प्रहरी वृत्तले पक्राउ गरेका उनीहरू काठमाडौं जिल्ला प्रशासन कार्यालयबाट धरौटीमा रिहा भएका थिए।
रिहा भएलगत्तै सम्पत्ति शुद्धीकरण अनुसन्धान विभागले पक्राउ गरेको थियो।