गोरखाको धार्चे गाउँपालिकाले मान्बुमा जीप दुर्घटनामा परी घाइते भएकी गाउँपालिका उपाध्यक्ष फूलमाया गुरूङलगायत सात जनाको उपचार गर्न चन्दा उठाएको छ।
गाउँपालिका अध्यक्ष सन्तोष गुरुङले दुर्घटना भएको पाँच दिनपछि सूचना निकालेर घाइतेहरुको उपचारका लागि सहयोग गर्न आग्रह गरेका हुन्। दुर्घटनामा गम्भीर घाइतेहरुको हेलिकप्टरबाट काठमाडौँ ल्याएर नर्भिक अस्पतालमा उपचार भइरहेको छ।
'गम्भीर अवस्थामा रहेका घाइतेहरुको आर्थिक अवस्था ज्यादै कमजोर रहेकाले उहाँहरुको उपचारका लागि केही सहयोग रकम जुट्न थालेको र यस कार्यमा सहयोग गर्न चाहनु हुनेहरुले सहयोग रकम जम्मा गरिदिन हार्दिक अनुरोध गर्दछौँ,' सूचनामा भनिएको छ।
सहयोग गर्न चाहनेले धार्चे गाउँपालिकाको प्रकोप व्यवस्थापन कोषको सिभिल बैँक धार्चे शाखाको खाता नम्बर ०७५१०३५७०४१०७८ मा सहयोग रकम जम्मा गर्न गाउँपालिकाले आग्रह गरेको छ।
गाउँपालिकाले हालसम्मका सहयोगीको नाम पनि सार्वजनिक गरेको छ।
कांग्रेस महासमिति सदस्य राजेन्द्र बजगाईंले एक लाख एक सय, बेदप्रसाद काप्रीले २५ हजार, सन्तबहादुर गुरुङ र शेरमान गुरुङले १५/१५ हजार, पिताम्बर पोख्रेलले दश हजार पाँच सय, ठाकुर ढकालले दश हजार पाँच सय, कांग्रेस गोरखाका सचिव नन्दप्रसाद न्यौपानेले दश हजार र अमला अधिकारी गुरुङले १० हजार रुपैयाँ सहयोग गरेका छन्।
गण्डकी प्रदेशकी सांसद मनकुमारी गुरुङ, धिरन थापा, गणेशबहादुर गुरुङ, गोविन्द गुरुङ, लक्ष्मण गुरुङ र एलिजा गुरुङले पाँच/पाँच हजार सहयोग गरेका छन्।
गत मंगलबार राति बा १ च ५५०५ नम्बरको जीप सडकबाट करिब दुई सय मिटर तल खस्दा धार्चे गाउँपालिका वडा नम्बर ६ का सचिव किरण रिमालको घटनास्थलमै मृत्यु भएको थियो।
सोही दुर्घटनामा गाउँपालिका उपाध्यक्ष गुरूङ, जीप चालक बालचन्द्र गुरूङ, धनबहादुर गुरूङ, टेयरसिंह गुरूङ, सुरज नेपाल, निशा गुरूङ र सर्मिला गुरूङ गम्भीर घाइते भएका थिए।
सिमसिम पानी परिरहेका बेला कच्ची सडकको घुम्तीबाट चिप्लेर जीप दुर्घटना भएको अनुमान प्रहरीले गरेको छ।
