कोरोना भाइरसको परीक्षण र उपचारमा चाहिने स्वास्थ्य सामग्री लिएर धनगढी जान उडेको नेपाली सेनाको स्काई ट्रक बीचबाट फर्किनुमा क्लोरिन कारक भएको आशंका गरिएको छ।
बिहान साढे ७ बजे धनगढीका लागि उडेको स्काई ट्रक १५ मिनेटपछि फर्किएको थियो। भित्रैबाट आएको पिरो रागले उडानमा समस्या आएपछि स्काई ट्रक फर्किएको थियो।
'स्काई ट्रकका पाइलटको आँखा पिरो भएपछि फर्काइएको हो। सुर्खेत गएको स्काई ट्रकमा भने उक्त केमिकल झिकिएको थियो,' नेपाली सेनाका प्रवक्ता विज्ञानदेव पाण्डेले भने,'विराटनगर जान लागेको स्काई ट्रक ग्राउन्डमै रोकिएको हो। अहिले यसको अनुसन्धान भइरहेको छ। तर आशंका क्लोरिन्सकै कारण हो कि भन्नेछ।'
क्लोरिन किटाणु मार्ने एक प्रकारको रसायन हो।
अनुसन्धान पूर्ण रूपमा सकिएपछि स्काई ट्रक उडानको समय तय हुने प्रवक्ता पाण्डेले बताए।
