रौतहटमा जलाउन लागेको शवलाई प्रहरीले नियन्त्रणमा लिएको छ।
बुधबार बिहान करिब ४ बजे चन्द्रपुर नगरपालिका १०की सीमाकुमारी पण्डितको मृत्यु भएको थियो। मृत्यु भएपछि परिवारले माइती पक्षलाई खबर नगरी घाटमा शव जलाउन लगेका थिए।
माइती पक्षले थाहा पाएर बिहान ७ बजे प्रहरीलाई खबर गरेपछि जलाउन लगेको शवलाई नियन्त्रणमा लिन प्रहरीको टोली घटनास्थल पुगेको थियो।
प्रहरी आउने थाहा पाएपछि श्रीमान मुकेश पण्डित भागेको इलाका प्रहरी कार्यालय चन्द्रपुरका डिएसपी हेम शाहीले बताए।
‘हामी आउने थाहा पाएपछि उनका श्रीमानसहित केही भागेका थिए,’ उनले भने, ‘त्यसपछि हामीले शवलाई नियन्त्रण लिएर पोष्टमर्टमको लागि पठाएका छौं।’
उनले आत्महत्या गरेकी हुन् वा हत्या गरिएको हो भन्ने बारेमा भने अनुसन्धान पछि मात्रै थाहा हुने डिएसपी शाहीले बताएका छन्।
‘त्यसलाई आत्महत्या भन्ने की हत्या भन्ने पछि अनुसन्धानबाट खुल्न आउँछ,’ उनले भने, ‘हामीले श्रीमान भागेलगत्तै उनको खोजी सुरू गरेका थियौं र अहिले नियन्त्रणमा लिएका छौँ।’