मकवानपुरको भीमफेदी कारागारबाट भागेर फरार भएका व्यक्ति पक्राउ परेका छन्। कात्तिक ३० गते कारागारबाट फरार भएका सुनसरी रामधुनी नगरपालिका-७का २५ वर्षीय कुलदिपराज धामीलाई शुक्रबार मकवानपुर प्रहरीले पक्राउ गरेको हो।
उनलाई प्रहरीले पूर्वी नवलपरासी देवचुली नगरपालिका-१६ रजहरस्थित पुल छेउबाट पक्राउ गरेको हो। धामीले २१ वर्षीय रोजिन गुरूङको हत्या गरेपछि २० वर्ष कैद सजाय सुनाइएकाे थियो।
'उनी भीमफेदी कारागारमा कैद भुक्तानी गर्दै थिए। करिब पाँच वर्ष भुक्तान गरिसकेका थिए तर बीचमा पर्खाल नाघेर भागे,' मकवानपुर जिल्ला प्रहरी कार्यालयका डिएसपी इन्द्रबहादुर रानाले भने।
कारागार पर्खालको उचाई लामो भएपनि उनी कसरी भाग्न सफल भए भन्ने प्रश्न उठेको थियो। 'पर्खाल ठूलो नै छ तर बीचबीचमा अलिअलि खाली भएका ठाउँमा बलजफ्ती हात-खुट्टा छिराएर नाघेको बयान दिएका छन्,' डिएसपी रानाले भने।
उनी कारागारबाट भागेपछि भारत गएका थिए। कोरोनाभाइरसको महामारीका कारण भारतमा लकडाउन भएपछि नेपाल फर्किए। प्रहरीले पनि उनी नेपाल फर्किएको सूचना पाएपछि खाेजीकार्यमा पक्राउ परे।
'कारागारबाट भागेर उनी भारत गए तर लकडाउनपछि नेपाल आएको भन्ने सूचना आएपछि हामीले उनको खोजी गर्यौं र पक्राउ गर्यौं,' उनले भने।
साथै उनी कारागारबाट भागेको हुँदा थप सजाय हुने जिल्ला प्रहरी कार्यालयले जनाएको छ।
'१५ वर्ष बाँकी थियो तर जेलबाट भागे, फेरि साढे सात वर्ष कैद सजाय बढ्नेछ,' डिएसपी रानाले भने। उनलाई भीमफेदी कारागारमा नै पठाउने तयरी गरिएको छ।