प्रदेश २ का विभिन्न जिल्लामा अहिलेसम्म ८८ जना प्रहरीमा कोरोना संक्रमण पुष्टि भएको छ।
भारतसँगको खुल्ला सीमा नाकामा खटिएका तथा लकडाउन कार्यान्वयन गराउने सुरक्षाकर्मीहरुमा कोरोना संक्रमण देखिएको २ नम्बर प्रदेश प्रहरी कार्यालय जनकपुरका प्रहरी प्रवक्ता, प्रहरी नायव उपरीक्षक अंशुकुमार सिंहले जानकारी दिए।
उनका अनुसार अहिलेसम्म ३८ जना प्रहरी कोरोनाबाट निको भएर डिस्चार्ज भइसकेका छन्। कोरोना संक्रमित हुने प्रहरीमा सबैभन्दा बढी पर्साका २६ जना छन्।
पर्सामा कोरोनामुक्त हुनेमा एक जना प्रहरी मात्रै छन्। त्यस्तै धनुषामा २२ जना संक्रमित भएका छन् भने १५ जना निको भएर डिस्चार्ज भइसकेका छन्।
बारामा १४ प्रहरी संक्रमितमध्ये ७ निको भई घर फर्किएका छन्। सप्तरीमा १३ मध्ये ५, रौतहटमा ५ मध्ये ४, सर्लाहीमा ४ मध्ये २ जना निको भएर डिस्चार्ज भएका छन्।
त्यस्तै सिरहा र महोत्तरीमा दुई/दुई जना प्रहरी संक्रमित हुँदा सबै जना निको भएर डिस्चार्ज भएको प्रदेश प्रहरी कार्यालय जनकपुरले जनाएको छ।
प्रदेश प्रहरी प्रवक्ता सिंहका अनुसार अहिलेसम्म कोरोनाको लक्षण देखिएका र संक्रमित भएका सुरक्षाकर्मीहरुको सम्पर्कमा आएकाहरुको मात्र पिसिआर परिक्षण गरिएको छ।