नेपाल पर्वतारोहण संघ (एनएमए)ले कुष्ट रोगबाट ग्रसित दुई सय जनालाई न्यानो कपडा र स्वास्थ्य सामाग्री वितरण गरेको छ।
एनएमएले जापानको ‘द निप्पोन फाउन्डेसन’ को आर्थिक सहयोगमा सञ्चालन गरिरहेको परियोजनाअन्तर्गत दक्षिणकाली नगरपालिका वडा नम्बर २ स्थित खोकना आरोग्य आश्रममा रहेका कुष्ट रोगबाट ग्रसित व्यक्तिहरूलाई सहयोग गरेको हो।
आश्रममा रहेको प्रत्येक व्यक्तिले ज्याकेट एक थान, डबल साइजको एक थान ब्लाङ्केट, दुई सय ३६ एमएलको एक बोतल स्यानिटाइजर, दुई वटा डिटोल साबुन र पचास पिसको एक प्याकेट मास्क प्राप्त गरेका छन्।
दक्षिणकाली नगरपालिका वडा नम्बर दुईका अध्यक्ष रामचन्द्र क्षेत्री, नेपाल कुष्टरोग निवारण संघका प्रशासकीय अधिकृत जितबहादुर हमाल र एनएमएका अध्यक्ष सन्तवीर लामाले कपडा र स्वास्थ्य सामाग्री हस्तान्तरण गरेका थिए। सहयोग प्राप्त गरेपछि क्याम्पमा आश्रीत व्यक्तिहरूले खुसी व्यक्त गरेका छन्।
एनएमएका अध्यक्ष लामाले यो सहयोगले आश्रममा आश्रीत व्यक्तिहरूलाई जाडो मौसममा न्यानो हुन मद्धत पुग्ने बताए।
जुममार्फत कार्यक्रममा सहभागी भएका द निप्पोन फाउन्डेसनका वरिष्ठ निर्देशक सेको मासातोले कुष्ट रोग निवारणको अभियानमा फाउन्डेसनले लामो समयदेखि काम गर्दै आइरहेको बताए।
‘यो हाम्रा लागि साच्चिकै महत्वपूर्ण काम हो’, निर्देशक मासातोले भने, ‘हामीलाई विश्वास छ कि यो सहयोग यहाँहरुको दैनिक जिवनमा महत्वपूर्ण सावित हुनेछन्।’
संघले यही परियोजनाअन्तर्गत आगामी महिना कोरोना भाइरस महामारीबाट प्रभावित तीन हजार पर्वतारोहीहरूलाई खाद्यान्न राहत वितरण गर्ने जनाएको छ।