काठमाडौं महानगरपालिकाले जय बागेश्वरी क्षेत्रका ७५ वटा भवनहरूलाई मौलिक स्वरूपमा रूपान्तरण गर्ने भएको छ।
वडा नम्बर ८ स्थित जय बागेश्वरी क्षेत्रका ७५ वटा भवनहरूलाई मल्लकालीन शैलीमा रूपान्तरण गर्न लागेको वडाध्यक्ष आशामान संगतले बताए।
उनका अनुसार जय बागेश्वरी मन्दिरदेखि सेतो ढोकासम्मको २९० मिटर सडक दायाँबायाँ रहेका घरहरूको सडकतर्फको मोहडालाई मल्लकालीन स्वरूपमा ल्याइने छ। जसका लागि निर्माण पक्षसँग ९ करोड ४ लाख रूपैयाँमा सम्झौता पनि भइसकेको छ।
'लिच्छवीकालीन काठमाडौं सहरको प्राचीनतालाई कायम राखेर मौलिक स्वरूप पुस्तान्तरण गर्नु योजनाको मुख्य उद्देश्य हो,' उनले भने, 'यसले पर्यटनलाई पनि टेवा पुर्याउँछ।'
यस क्रममा वडाले करिब ३ रोपनी क्षेत्रफलमा फैलिएको यःपुखु (मनपर्ने पोखरी) पुनर्निर्माण गर्दैछ।
काठमाडौँ महानगरपालिका क्षेत्रभित्रका ऐतिहासिक, पुरातात्विक, सांस्कृतिक तथा वास्तुकलात्मक महत्वका परम्परागत शैलीका निजी तथा संस्थागत स्वामित्वका भवनहरूको स्वरूपलाई कायम राख्न कार्यक्रम कार्यान्वयनमा ल्याइएको हो।
अब रूपातरण हुने मल्लकालीन शैलीमा घरमा पेटी, कार्नेस, बलेँसी, पाखा वा पाली, झिँगटीको छानो जस्ता भाग हुनेछन्।
यस्तै घरको गारोमा प्रयोग गरिएका इँटा बाहिरबाट देखिने खालका हुनेछन्। एकमुखे, तीनमुखे, पाँचमुखे गरी बिजोर कुँदिएका बुट्टेदार परम्परागत झ्यालहरू हुनेछन्। छिँडी, मातः, च्वतं र बुईंग गरी चार तला तथा छानासहितको घरको डिजाइन हुनेछ।
'आधुनिक बनेको संरचनालाई उक्त डिजाइन ल्याउन कोसिस गरिएको हो', उनले भने।
-1756446574.jpg)
-1746009348.jpg)
