सिराहामा बस दुर्घटना हुँदा दुई जनाको मृत्यु भएको छ।
आइतबार दिउँसो गोलबजार नगरपालिका-९ स्थित मारुती सिमेन्ट फ्याक्ट्री नजिकै बस दुर्घटना हुँदा दुई जनाको मृत्यु भएको जिल्ला प्रहरी कार्यालय सिराहाका डिएसपी रविन्द्रराज पाण्डेयले जानकारी दिए।
राजविराजबाट जनकपुरतर्फ आउँदै गरेको ना ४ ख ७१८७ नम्बरको बसमा सवार २३ जना घाइते समेत भएका छन्।
दुर्घटनामा मिर्चैया नगरपालिका-२ स्थित मल्हनिया बस्ने ४० वर्षीय राजकुमार सदा र बसका सहचालक जनकपुरधाम उपमहानगरपालिका-२० बस्ने ५२ वर्षीय अनिल झाको मृत्यु भएको हो।
डिएसपी पाण्डेयका अनुसार बसको स्प्रिङ पट्टा भाँचिएर दुर्घटना भएको हो।
घाइतेको सिराहाका विभिन्न अस्पतालमा उपचार भइरहेको छ। बस चालक महोत्तरीको भंगहा नगरपालिका-४ बस्ने २९ वर्षीय संजिव सिंह थारुलाई प्रहरीले नियन्त्रणमा लिएको छ।
घटनाबारे थप अनुसन्धान भइरहेको डिएसपी पाण्डेयले बताए।
