सिरहाको गोलबजारमा एक जना महिलाको हत्या भएको छ।
गोलबजार नगरपालिका-६ बस्ने ३५ वर्षीया अनिता साह शनिबार बिहान करिब पौने २ बजे मृत फेला परेकी हुन्। उनी सुत्ने खाट छेउमा मृत फेला परेकी हुन्। उनका श्रीमान महेन्द्र साह अचेत अवस्थामा फेला परेका थिए।
प्रहरीका अनुसार उनीहरूबीच झगडा भइरहेको भन्ने सूचना प्रहरीले पाएको थियो। उक्त खबरपछि प्रहरीको टोली घटनास्थलमा पुगेको थियो।
दुबै जनाले मिलेर गोलबजारमा सिकेन्द्र पुर्वेको घर भाडामा लिई चिया नास्ता होटल संचालन गर्दै आएका थिए।
‘अनिताको अनुहारमा धरिलो हतियार प्रहार भएको देखिन्छ। त्यसपछि टाउकोमा ढुंगाले पनि प्रहार गरेको चोट देखिन्छ,’ सिरहाका एसपी सन्तोष आचार्यले भने, ‘श्रीमान-श्रीमतीबीच पछिल्लो समय कुरा नमिलेको भन्ने बुझिएको छ।तर हत्या कसले गरेको ठ्याक्कै पत्ता लागिसकेको छैन।’
उनका अनुसार घटनामा संलग्न भएको आशंकामा प्रहरीले अनुसन्धानका लागि तीन जनालाई नियन्त्रणमा लिएको छ।
अचेत भेटिएका अनिताकी श्रीमान महेन्द्रको अहिले उपचार भइरहेको छ। अनिताको शव पोष्टमर्टमका लागि लहान अस्पताल पुर्याइएको छ। घटनाबारे थप अनुसन्धान भइरहेको एसपी आचार्यले बताए।
