झापाको प्लाइ उद्योगमा लागेको आगो नियन्त्रण गर्न सोमबार रातभरि ६ वटा दमकल खटिने भएका छन।
मेचीनगर-१५ ज्यामिरगढीस्थित प्लाइ उद्योग भगवती लेमिनेट्समा सोमबार बिहानैबाट सुरू भएको आगलागी अहिलेसम्म नियन्त्रणमा आएको छैन।
झापाका प्रमुख जिल्ला अधिकारी बन्धुप्रसाद बास्तोलाका अनुसार मोरङको पथरी शनिश्चरे, इलामको सूर्योदय, गौरादह र भारतीय दमकल केही बेरअघि फर्केका छन्। बाँकी ६ वटा दमकल घटनास्थलमा खटिएका छन्।
'अब आगो अन्यत्र फैलिने सम्भावना लगभग अन्त्य भएको छ,' उनले भने, 'त्यसैले ६ वटा दमकल रातभरि खटिने छन्। बिहानसम्म आगो नियन्त्रणमा आउने अपेक्षा गरेका छौं।'
बिहान ५ बजे सुरू भएको आगलागीबाट उद्योगको एउटा सेडभित्र रहेका केही मेसिनसहित कच्चापदार्थ ध्वस्त भएका छन्।
घना आवादी भएको गाउँको मध्यभागमा रहेको उद्योगमा लागेको आगोले सिंगो गाउँ त्रस्त बनेको छ। आगो लाग्नुको कारण अहिलेसम्म खुलेको छैन। बिजुलीमा भएको गडबडीले हो वा अन्य कारणले हो भन्ने खुल्न नसकेको प्रहरीले जनाएको छ।
झापा, इलाम, मोरङ र भारतका १० वटा दमकल, नेपाल प्रहरी, नेपाली सेना, सशस्त्र प्रहरीसहितको टोली आगो निभाउन बिहानैदेखि खटिएका थिए। तर सुख्खा काठका सामानको थुप्रोमा लागेको आगो झन् झन् तेजिलो हुँदै जाँदा नियन्त्रणमा लिन गाह्रो परेको हो।
झापाका प्रहरी प्रमुख एसपी मिलन केसीका अनुसार दिनभरि आगो धेरै मत्थर भए पनि अपेक्षाअनुसार नियन्त्रणमा आएको छैन।
चौध सय मजदुर काम गर्ने यो उद्योगमा आधा दर्जनभन्दा बढी सञ्चालक छन्।
-1710157498.jpg)
