तत्कालीन सेञ्चुरी बैंकका पूर्वसिइओसहित १० जना पक्राउ परेकाहरूलाई थप पाँच दिन हिरासतमा राख्न अनुमति प्रहरीले पाएको छ।
उच्च अदालत पाटनले मंगलबार थप पाँच दिन हिरासतमा राख्न अनुमति दिएको केन्द्रीय अनुसन्धान ब्युरो (सिआइबी)का एसपी होबिन्द्र बोगटीले जानकारी दिए।
अदालतबाट बैंकरहरूलाई तेस्रो पटक म्याद थपिएको हो। पहिलो पटक सात दिन, दोस्रो पटक सात दिन र तेस्रो पटक पाँच दिनका लागि म्याद थप भएको हो।
फागुन १५ गते सिआइबीले धितो मूल्यांकनभन्दा ९७ करोड बढी ऋण प्रवाह गरेको भन्दै १० जनालाई पक्राउ गरेको थियो। यस प्रकरणमा अझै अनुसन्धान नसकिएको भन्दै प्रहरीले म्याद थप गरेको हो।
तत्कालीन सेञ्चुरी कमर्सियल बैंकमा रहँदा प्रमुख कार्यकारी अधिकृत रहेका मनोज न्यौपानेसँगै पूर्वप्रमुख कार्यकारी अधिकृत तुलसी गौतम सिआइबीको हिरासतमा छन्। न्यौपाने प्रभु बैंकका वरिष्ठ नायब प्रमुख कार्यकारी अधिकृत समेत थिए।
राजेश भण्डारी, दिलिप बराल, सुवासबहादुर श्रेष्ठ, अनुपमा श्रेष्ठ मानन्धर, सविन घिमिरे, रमन श्रेष्ठ, दिपेश प्रधान र सुनिल बस्नेत प्रहरी हिरासतमा छन्।
सिआइबीले उनीहरूमाथि बैंकिङ कसुर तथा सजाय ऐन, २०६४ बमोजिम अनुसन्धान गरिरहेको हो।
सिआइबीले देउराली बहुउद्देश्यीय सहकारी संस्था लिमिटेड सातदोबाटोमाथि अनुसन्धान गरेको थियो।
उक्त संस्थामा आबद्ध रहेका सञ्चालक समितिका पदाधिकारीहरू, उनीहरूसँग सम्बन्धित कम्पनीहरूको विवरण र कम्पनीहरूले लिएका कर्जाको विषयमा सिआइबीले अनुसन्धान गरेको थियो।
देउराली सहकारीका अध्यक्ष रविन्द्र चौलागाईं हाल पुर्पक्षको लागि थुनामा छन्। सहकारीको रकम अपचलन गरेको कसुरमा उनी थुनामा छन्।
उनले र उनी आवद्ध चार कम्पनीलाई तत्कालीन सेञ्चुरी कमर्सियल बैंकले ऋण प्रवाह गरेको पाइएको एसपी बोगटीले बताएका थिए।
उनी आबद्ध कम्पनीहरू पूजा ट्रेडिङ एण्ड मार्केटिङ कम्पनी प्रालि, थ्री ब्रदर्स मार्केटिङ प्रालि, पुजा मार्केटिङ प्रालि र अन्नपूर्ण डिष्टिलरी प्रालिलाई कर्जा प्रवाह गर्दा धितो स्वरूप बैंकमा कर्जा सुरक्षण बापत राखिने धितोको मूल्यांकनभन्दा बढी ऋण प्रवाह गरेको पाइएको हो।
सिआइबीका अनुसार धितोको मूल्यांकन एक अर्ब १४ करोड २३ लाख ८४ हजार २५८ रुपैयाँ थियो। तर कर्जा स्वरूप दुई अर्ब ११ करोड ६५ लाख ५५ हजार ७३१ रुपैयाँ प्रवाह भएको अनुसन्धानमा देखिएको एसपी बोगटीले बताएका थिए।
यसरी धितोको मूल्यांकनभन्दा ९७ करोड ४१ लाख ७० हजार ७७२ रुपैयाँ ऋण प्रवाह गरेको भन्दै सिआइबीले १० जनालाई पक्राउ गरेको हो।
