वित्तीय संस्थाको सूचना प्रणालीमा अनधिकृत पहुँच पुर्याउने प्रयास गरेको आरोपमा प्रहरीले एक जनालाई पक्राउ गरेको छ।
साइबर ब्युरोले कास्की पोखरा महानगरपालिका वडा नम्बर १७ बिरौटास्थित डेरामा बस्ने २६ वर्षीय नवराज लामिछानेलाई पक्राउ गरेको हो।
प्रदेश प्रहरी कार्यालय र जिल्ला प्रहरी कार्यालयको सहयोगमा उनलाई पक्राउ गरी काठमाडौं ल्याइएको एसपी दिपकराज अवस्थीले जानकारी दिए।
उनले वित्तीय क्षेत्रसँग सम्बन्धित संस्थाको सूचना प्रणालीहरूमा अनधिकृत रूपमा पहुँच पुर्याउने मनसायले लामो समयदेखि निरन्तर प्रयास गरिरहेको प्रहरीको आरोप छ।
उनले कुन संस्थाको सूचना प्रणालीमाथि पहुँच पुर्याउन खोजेको भन्ने प्रहरीले खुलाएको छैन।
उनीमाथि प्रहरीले विद्युतीय कारोबार ऐन, २०६३ अन्तर्गत अनुसन्धान गर्न जिल्ला अदालत काठमाडौंबाट ६ दिन हिरासतमा राख्न अनुमति लिएको छ।
