नेपाल टेलिकमका इन्जिनियर निर्मलप्रसाद सिटौलाविरूद्ध भ्रष्टाचारको मुद्दा दायर भएको छ।
अख्तियार दुरूपयोग अनुसन्धान आयोग टंगालले आइतबार विशेष अदालतमा गैरकानुनी रूपमा सम्पत्ति आर्जन गरेको भन्दै सापकोटाविरूद्ध मुद्दा दायर गरेको प्रवक्ता नरहरि घिमिरेले बताए।
अख्तियारले उनीविरूद्ध एक करोड ६१ लाख २० हजार ४ रुपैयाँ जफत गरी जरिवाना र सजाय गर्न माग गरेको छ।
टेलिकममा स्थायी कर्मचारी रहेका सिटौलाले कार्यालयमा हाजिर गरेर छुट्टै हिमदुङ एन्ड ठोकर कन्स्ट्रक्सन कम्पनीमा काम गरी व्यापार व्यवसाय गरेको अख्तियारको दाबी छ।
उनले सूर्यविनायक-धुलिखेल-सिन्धुली-बर्दिबास सडक आयोजनामा ठेक्का लिएर प्रतिनिधिको रूपमा हस्ताक्षर समेत गरेको भन्ने उजुरी परेको थियो।
त्यसमाथि अनुसन्धान गर्दा टेलिकमका प्राविधिक अधिकृतसमेत रहेका सिटौलाले व्यापार व्यवसाय संचालन गर्न वा बाह्य कार्य गर्न स्वीकृत लिनुपर्ने कानुनी प्रावधान विपरीत कम्पनीको शेयर खरिद गरी संस्थापक शेयरधनी बनेको अख्तियारले जनाएको छ।
उनी कम्पनीमा निर्देशकको हैसियतमा आर्थिक वर्ष २०६९/०७० देखि काम गरिरहेको, पारिश्रमिकबापत रकम बुझेको तथा विभिन्न ठेक्कापट्टामा समेत सामेल भई ४५ लाख १७ हजार ५०० रुपैयाँ पारिश्रमिक लिएको अनुसन्धानमा देखिएको प्रवक्ता घिमिरेले बताए।
त्यस्तै कम्पनीमा रहेको मुनाफाबाट प्राप्त आय एक करोड १६ लाख २ हजार ५०४ रुपैयाँ समेत गरी जम्मा एक करोड ६१ लाख २० हजार ४ रुपैयाँ गैरकानुनी व्यापार व्यवसाय गरी आर्जन गरेको पुष्टि भएको अख्तियारले जनाएको छ।
भ्रष्टाचार निवारण ऐन, २०५९ को दफा १४ अनुसार गैरकानुनी व्यापार व्यवसाय गर्ने राष्ट्रसेवकलाई सजाय दिनसक्ने प्रवधान छ। उक्त कसुर अनुसार सापकोटालाई तीन महिनादेखि ६ महिनासम्म कैद र १० हजार रुपैयाँदेखि ५० हजार रुपैयाँसम्म जरिवाना हुनसक्छ।
उनले आर्जन गरेको सम्पत्ति पनि जफत गर्ने व्यवस्था छ।
पब्लिक लिमिटेड कम्पनीबाट सार्वजनिक बिक्रीका लागि खुला गरिएका शेयर खरिद गर्न भने उक्त दफाले बाधा नपुर्याउने भनिएको छ।
तर राष्ट्रसेवकले आफ्नो वा अरूको नामबाट वा साझेदारीमा व्यापार गरेमा वा लिलाम बढाबढ वा ठेक्का पट्टामा भाग लिएमा वा कुनै फर्म वा कम्पनीमा वा सहकारी संस्थाको हिस्सेदार हुन नपाउने उल्लेख छ।
